اسلام آباد – 27 آگسٽ (اي پي پي) ڊائريڪٽوريٽ آف نيشنل سيونگز جاري مالي سال لاءِ 1.3 ٽريلين روپين جي بچتن جو هدف مقرر ڪيو آهي. ڊائريڪٽوريٽ جي هڪ سينيئر اهلڪار اي پي پي کي ٻڌايو ته ملڪ ۾ بچتن کي هٿي ڏيڻ لاءِ ادارو پنهنجو ڪردار ادا ڪري رهيو آهگي ۽ ان مقصد لاءِ جاري مالي سال دوران 1.3 ٽريلين روپين جي بچتن جو هدف مقرر ڪيو ويو آهي. هن چيو ته اهڙي طرح اسلامي ماليات کي هٿي ڏيڻ لاءِ جاري مالي سال دوران 50 ارب روپين جي سيڙپڪاري جو هدف مقرر ڪيو ويو آهي جنهن سان ملڪ ۾ اسلامي ماليات کي هٿي ڏيڻ ۾ مدد ملندي. هن چيو ته پهرين جولاءِ کان 20 آگسٽ تائين سي ڊي اين ايس 150 ارب روپين جون بچتون حاصل ڪيون آهن. هڪ سوال تي هن چيو ته گذريل سال اداري 1650 ارب روپين جي بچتن جو هدف مقرر ڪيو هو، اهڙي طرح اسلامي ماليات تحت 170 ارب روپين جي بچتن جو هدف هو. هن چيو ته اداره جاتي سڌارن جو عمل به جاري آهي، نيشنل سيونگز جي صارفين کي اي ٽي ايم جو سهولت اڳ ئي فراهم ڪئي وئي آهي جڏهن ته وڌيڪ سهولتن تي ڪم جاري آهي.
