اسلام آباد -17 آگسٽ (اي پي پي) وزيراعظم محمد شهباز شريف ڪيش ليس معيشت لاءِ کنيل قدمن ۽ اڳڀرائي تي اطمينان جو اظهار ڪندي چيو آهي ته حڪومت معيشت جي ڊجيٽلائيزيشن ۽ ٽرانزيڪشن سسٽم کي ڪيش ليس ۽ ڊجيٽل سسٽم ڏانهن وٺي وڃڻ لاءِ ترجيحي بنيادن تي ڪم ڪري رهي آهي. سڀئي چيف سيڪريٽري وفاقي حڪومت سان راست سسٽم کي ضلعي حڪومتن جي سطح تائين وٺي وڃڻ ۾ مڪمل تعاون ڪن. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف جي صدارت ۾ ڪيش ليس ۽ ڊجيٽل معيشت بابت هڪ جائزه اجلاس منعقد ٿيو. ان موقعي تي وزيراعظم چيو ته سڀئي چيف سيڪريٽري وفاقي حڪومت سان راست سسٽم کي ضلعي حڪومتن جي سطح تائين وٺي وڃڻ ۾ مڪمل تعاون ڪن. ڪيش ليس معيشت لاءِ کنيل قدمن تي اڳڀرائي تي بريفنگ ڏيندي اجلاس کي ٻڌايو ويو ته پاڪستان ڊجيٽل پبلڪ انفراسٽرڪچر ذريعي ڊجيٽل آئي ڊيز ٺاهيون وينديون، جنهن ۾ هر شخص جي قومي سڃاڻپ ڪارڊ، بايوميٽرڪ ۽ موبائل فون نمبرن بابت معلومات هوندي. انهن ڊجيٽل آئي ڊيز ذريعي ڊجيٽل ادائيگيون ڪيون وينديون. بريفنگ ۾ چيو ويو ته صوبائي حڪومتن عوام کي حڪومت ۽ حڪومت کان عوام جي ادائيگين جي نظام سان سڌو سنئون ڳنڍڻ ۾ اهم اڳڀرائي ڏيکاري آهي. ڊجيٽل انفراسٽرڪچر جي تعمير جي حوالي سان، وفاقي ترقياتي اداري فائبر ڪنيڪٽوٽي لاءِ رائٽ آف وي ڏنو آهي، جڏهن ته ان حوالي سان پاڪستان ريلوي ۽ نيشنل هاءِ وي اٿارٽي سان ڳالهيون جاري آهن. اجلاس ۾ ناڻي ۽ روينيو واري وفاقي وزير محمد اورنگزيب، اقتصادي معاملن واري وفاقي وزير احد خان چيما، اطلاعات ۽ نشريات واري وفاقي وزير عطاءُ الله تارڙ، انفارميشن ٽيڪنالاجي ۽ ٽيليڪام واري وفاقي وزير شزا فاطمه خواجه، پيٽروليم واري وفاقي وزير علي پرويز ملڪ، وزيراعظم جي صلاحڪار ڊاڪٽر توقير شاهه، ناڻي ۽ ريلوي واري مملڪتي وزير بلال اظهر ڪياني ۽ لاڳاپيل اعليٰ سرڪاري عملدارن شرڪت ڪئي.
