اسلام آباد-16 آگسٽ (اي پي پي) گهرو معاملن واري وفاقي وزير محسن نقوي بهاولپور جي علائقي اوچ شريف ۾ شهيد ڪيپٽن محمد آصف جي رهائشگاهه پهچي شهيد ڪيپٽن محمد آصف جي والدين، ڀائرن ۽ ٻين ڪٽنب جي ڀاتين سان ملاقات ڪري دلي همدردي ۽ تعزيت جو اظهار ڪندي فاتحه خواني ڪئي. گهرو وزارت مان جاري بيان موجب گهرو وزير شهيد ڪيپٽن محمد آصف جي ڏکويل ڪٽنب لاءِ صبر جي دعا ڪئي ۽ شهيد ڪيپٽن جي والد، والده ۽ ڀائرن جي عزم ۽ حوصلي کي ساراهيو. هن شهيد ڪيپٽن جي والده کي دلاسو ڏنو ۽ سندس همٿ کي سلام پيش ڪيو. گهرو وزير محسن نقوي شهيد ڪيپٽن محمد آصف جي 10 مهينن جي پٽ محمد ارسلان سان شفقت جو اظهار ڪندي ان کي پنهنجي هنج ۾ ويهاري پيار ڪيو. ان موقعي تي گهرو وزير شهيد ڪيپٽن محمد آصف جا ننڍي عمر ۾ ملندڙ ميڊلز ۽ ايوارڊز به ڏٺا. هن شهيد جي ڪٽنب سان ڳالهائيندي چيو ته اوهان جهڙن باهمٿ خاندانن جو حوصلو ئي اصل طاقت آهي. شهيد ڪيپٽن محمد آصف بهادري جو لازوال مثال آهي، محسن نقوي چيو ته شهيد ڪيپٽن محمد آصف جي والدين کي سلام پيش ڪريان ٿو. هن چيو ته شهيد فتنه الهندستان جي دهشتگردن خلاف بهادري سان وڙهندي شهادت ماڻي، شهيد زخمي ٿيڻ باوجود بهادري سان ڀارتي حمايت يافته دهشتگردن کي جهنم ڀيڙو ڪيو.
