لاهور-08 آگسٽ (اي پي پي) پاڪستان شاهين جي ٽيم ڇنڇر ڏينهن ڊاورن، آسٽريليا رواني ٿيندي، جتي هو 14 کان 24 آگسٽ تائين جاري رهندڙ ٽاپ اينڊ ٽي 20 سيريز ۾ شرڪت ڪندي. پي سي بي ترجمان موجب 11 ٽيمن تي ٻڌل ان ايونٽ ۾ پاڪستاني شاهين پنهنجي پهرين ميچ 14 آگسٽ تي بنگلاديش اي خلاف ٽي آءِ او اسٽيڊيم ۾ شام 7 وڳي (مقامي وقت) کيڏندا. ترجمان موجب پاڪستان ڪرڪيٽ بورڊ 15 رڪني اسڪواڊ ۾ ٻن تبديلين جو اعلان ڪيو آهي. بيٽسمين حيدر علي کي نضم ۽ ضبط جي خلاف ورزي تي عارضي طور تي معطل ڪرڻ کانپوءِ سندس جاءِ تي محمد فائق کي شامل ڪيو ويو آهي جڏهن ته کاٻي هٿ جي فاسٽ بالر سلمان مرزا جي جاءِ تي فاسٽ بالر محمد وسيم جونيئر کي اسڪواڊ جو حصو بڻايو ويو آهي. قومي شاهينز جي اڳواڻي محمد عرفان خان ڪندو جڏهن ته ٻين رانديگرن ۾ عبدالصمد، احمد دانيال، فيصل اڪرم، خواجه محمد نافع (وڪيٽ ڪيپر) معاذ صداقت، مهراڻ ممتاز، محمد فائق، محمد وسيم جونيئر، محمد غازي غوري (وڪيٽ ڪيپر)، مبصر خان، سعد مسعود، شاهد عزيز، عبيد شاهه ۽ ياسر خان شامل آهن. ٽيم انتظاميه ۾ غلام علي (هيڊڪوچ)، سميع الله نيازي (بولنگ ڪوچ)، منصور امجد (فيلڊنگ ڪوچ)، محمد ابراهيم (تجزيه ڪار) ۽ محمد عليم (فزيو) شامل آهن .
