اسلام آباد-06 آگسٽ (اي پي پي) چيف جسٽس آف پاڪستان ۽ لا اينڊ جسٽس ڪميشن آف پاڪستان جي چيئرمين (ايل جي سي پي) جسٽس يحيٰ آفريدي بار ايسوسيئيشنز ۽ـ ايل جي سي پي وچ ۾ اداره جاتي رابطن کي مضبوط بڻائڻ لاءِ پنهنجي ملڪ گير قدمن کي جاري رکندي سپريم ڪورٽ برانچ رجسٽري ڪراچيءَ ۾ اعليٰ سطحي اسٽريٽجڪ اجلاس جي صدارت ڪئي. سپريم ڪورٽ جي سڌ سماءَ واري شعبي مان جاري پڌرائيءَ موجب اجلاس ۾ خدمتن جي فراهمي کي بهتر بڻائڻ، ڀائيواريءَ واري قانون ۽ پاليسي سڌارن کي هٿي وٺرائڻ لاءِ قانوني برادري ۽ انصاف جي شعبي جي ادارن وچ ۾ هم آهنگي وڌائڻ تي ڌيان ڏنو ويو. چيف جسٽس انصاف تائين پهچ کي يقيني بڻائڻ ۾ بار جي اهم ڪردار کي تسليم ڪيو ۽ انصاف جي شعبي ۾ سڌارن کي اڳتي وڌائڻ ۾ بار ايسوسيئيشنز ۽ ايل جي سي پي وچ ۾ موجود هم آهنگي جي فرق جي نشاندهي ڪئي. هن ڪميشن جي هر صوبي ۾ اعليٰ سطح جي نمائندن کي مقرر ڪرڻ جي فيصلي جي توثيق ڪئي جيڪي هاءِ ڪورٽس ۾ مقرر آهن ته جيئن ضلعي بار ايسوسيئيشنز سان رابطن لاءِ فوڪل پوائنٽس تي ڪم ڪن. اهي آفيسر جاري قدمن جي باري ۾ سجاڳي پيدا ڪن، مقامي ترجيحي ضرورتن جي نشاندهي ڪندا ۽ هيٺئين سطح تي انصاف جي شعبي جي منصوبن کي لاڳو ڪرڻ جي نگراني ڪندا. چيف جسٽس بار جي اڳواڻن تي زور ڀريو ته هو پنهنجي ميمبرن کي انهن قدمن جي باري ۾ ڄاڻ ڏين ۽ ضلعي اينڊ سيشن ججن جي سربراهيءَ ۾ لاڳاپيل ضلعي ڊولپمينٽ ڪميٽين ذريعي انفراسٽريڪچر ۽ سگهه کي وڌائڻ جي منصوبن لاءِ تجويزون پيش ڪن. هن هدايت ڪئي ته بار ايسوسيئيشنز کي حڪومت طرفان فراهم ڪيل امداد کي قانوني شعبي جي ترقي ۽ انصاف جي فراهمي جي حوالي سان گهربل هدفن تي خرچ ڪئي وڃي ته جيئن وسيلن جي وڌ کان وڌ استعمال ۽ ڪارڪردگي کي يقيني بڻائي سگهجي. صوبائي کاتن جي نامزد ايل جي سي پي آفيسرن سان گڏجي ڪم ڪرڻ جي ضرورت تي زور ڀريندي چيف جسٽس منظور ٿيل منصوبن جي وقت سر پڄاڻيءَ جي اهميت کي اجاگر ڪيو. ضلعي عدليه ۽ قانوني برادريءَ سان صلاح مشوري جي بنياد تي هن سنڌ جي ڪجهه ضلعن ۾ عدالتي سهولتن جي کوٽ، سولرائيزيشن جي کوٽ ۽ محدود ڊجيٽل انضمام (خاص ڪري اِي لائبريريز) جهڙي خال جي نشاندهي ڪئي، جنهن ۾ صوبي جي سالياني ترقياتي منصوبي ۾ ان ترجيحن کي شامل ڪرڻ جي ضرورت تي زور ڀريو. هن وڌيڪ ان ڳالهه تي زور ڀريو ته انصاف جو شعبو رياست جو بنيادي ٿنڀ آهي، ان باوجود سنڌ ۾ ان لاءِ رکيل بجيٽ غير متناسب طور تي گهٽ آهي جيڪا اي ڊي پي جو صرف 0.3 سيڪڙو آهي. هن صوبائي حڪومت تي زور ڀريو جديد عدالتي نظام جي گهرجن کي پورو ڪرڻ لاءِ رکيل بجيٽ ۾ خاطرخواه واڌ ڪئي وڃي ۽ انصاف جي فراهميءَ جي هدفن کي حاصل ڪرڻ لاءِ مستقبل جي سالياني ترقياتي منصوبن ۾ ظاهر ڪرڻ گهرجي. سنڌ هاءِ ڪورٽ جي چيف جسٽس ضلعي عدليه جو جائزو پيش ڪيو، موجوده سهولتن ۽ درپيش مالي رڪاوٽن تي روشني وڌي. هن ان ڳالهه تي زور ڀريو ته قانوني چاره جوئي جي وڌندڙ شرح ۽ آباديءَ ۾ واڌ کي بجيٽ جي منصوبا بندي ۾ شامل هئڻ گهرجي ته جيئن مناسب وسيلن جي فراهمي کي يقيني بڻائي سگهجي. قانون واري وفاقي وزير اجلاس کي ٻُڌايو ته بار ايسوسيئيشنز لاءِ فنڊز رکڻ جو تعين عام طور تي رجسٽرڊ وڪيلن جي تعداد جي بنياد تي ڪيو ويندو آهي. بلوچستان جي معاملي تي رکيل فنڊز کي 6.3 سيڪڙو مان وڌائي 10 سيڪڙو ڪيو ويو آهي جيڪو ان جي ايف ايف سي فارمولي جي حصي کان به وڌيڪ آهي. چيف جسٽس مشاهدو ڪيو ته سنڌ لاءِ رکيل رقم تي به ان جي وڏي ڪيس جو ڳاڻيٽي ۽ ضرورتن جي روشنيءَ ۾ نظرثاني ڪرڻ گهرجي. چيف جسٽس بار جي ميمبرن کي فيڊرل جوڊيشل اڪيڊمي طرفان پيش ڪيل ڪنٽينيوئنگ ليگل ايجوڪيشن (سي ايل اي) پروگرامن مان ڀرپور فائدو کڻڻ جي به ترغيب ڏيندي هدايت ڪئي ته تربيتي ڪئلينڊڙ کي وسيع پيماني تي ڦهلايو وڃي ۽ هر بار ايسوسيئيشن اڪيڊمين سان هم آهنگيءَ لاءِ هڪ فوڪل پرسن مقرر ڪري. اجلاس ۾ سنڌ هاءِ ڪورٽ جي چيف جسٽس جنيد غفار کان علاوه سينيئر ترين جج سنڌ هاءِ ڪورٽ جسٽس ظفر احمد راجپوت، جسٽس محمد اقبال ڪلهوڙو، رجسٽرار سپريم ڪورٽ آف پاڪستان محمد سليم خان، وفاقي سيڪريٽري قانون راجا نعيم اڪبر، رجسٽرار سنڌ هاءِ ڪورٽ سهيل محمد لغاري، حيدرآباد هاءِ ڪورٽ بار ايسوسيئيشن جي صدر علي لوهار، سيڪريٽري ناڻو سنڌ فياض جتوئي، چيئرمين پلانگ اينڊ ڊولپمينٽ سنڌ نجم احمد شاهه ۽ ٻيا شريڪ هئا.
