اسلام آباد-06 آگسٽ (اي پي پي)پارلياماني معاملن بابت وفاقي وزير ڊاڪٽر طارق فضل چوڌري چيو آهي ته وفاقي حڪومت ڪنهن خاص علائقي يا قبيلي خلاف ٽارگيٽڊ آپريشن ناهي ڪري رهي، هن اهڙين دعوائن کي بي بنياد ۽ قومي اتحاد کي نقصان پهچائڻ وارو قرار ڏنو. قومي اسيمبليءَ ۾ مختلف ميمبرن طرفان اُٿاريل نُڪتن جو جواب ڏيندي هن چيو ته پاڪستان ڊگهي عرصي کان دهشتگرديءَ خلاف جنگ ۾ سڀ کان اڳيان رهيو آهي، نه صرف پنهنجي شهرين کي پر سڄي دنيا کي به عسڪريت پسنديءَ جي لعنت کان بچائڻ لاءِ هڪ ”لوهي ديوار“ وانگر بيٺل آهي. هن چيو ته پاڪستان دهشتگرديءَ خلاف جنگ ۾ بي پناهه قربانيون ڏنيون آهن. هن وڌيڪ چيو ته جتي دهشتگرديءَ جا واقعا ٿين ٿا اتي ڪارروائي ڪئي ويندي آهي. وفاقي وزير رياستي ادارن ۽ قبائلي عوام وچ ۾ ويڇا پيدا ڪرڻ جي ڪوششن خلاف خبردار ڪندي زور ڀريو ته اهڙيءَ طرح جا بيان صرف ملڪ جي دشمنن جي مفادن کي پورو ڪن ٿا. ڊاڪٽر طارق فضل چوڌري ان ڳالهه تي زور ڀريو ته دهشتگرديءَ خلاف جنگ هڪ اجتماعي قومي جدوجهد آهي جنهن لاءِ ڪنهن فرقي، صوبي يا نسل جي فرق بنا اتحاد جي ضرورت آهي. هن ان ويڙهه ۾ قبائلي عوام کي سندن قربانين تي خراجِ تحسين پيش ڪيو ۽ ملڪ جي بچاءُ ۾ سندن ڏُکيائين جو اعتراف ڪيو.
