اسلام آباد-06 آگسٽ (اي پي پي)قانون ۽ انصاف واري وفاقي وزير سينيٽر اعظم نذير تارڙ چيو آهي ته 9 مئي جي ڪيسن ۾ سزائون هڪ قانوني عدالتي عمل جو نتيجو آهن، ان ۾ حڪومت جو ڪو ڪردار ناهي. بئريسٽر گوهر علي خان طرفان قومي اسيمبليءَ ۾ اُٿاريل نُڪتن جي جواب ۾ هن چيو ته هڪ ڀيرو جڏهن ڪو ڪيس ٽرائل جي مرحلي تي پهچي وڃي ٿو ته اهو عدالت جو ڪم هوندو آهي ته اها ڪارروائي ۽ فيصلو ڪري. هن چيو ته اهو هڪ قانوني عمل آهي، اعتراض ڪري سگهجي ٿو پر اهڙو ڪرڻ جو فورم به عدالت ئي آهي. هڪ تازو مثال ڏيندي هن جمشيد دستي جي ڪيس جو حوالو ڏنو جنهن ۾ بينچ جي جوڙجڪ خلاف اُٿاريل اعتراضن باوجود لاهور هاءِ ڪورٽ دليل ٻُڌڻ کانپوءِ عارضي رليف ڏنو. هن چيو ته اهڙيءَ طرح جا اصول موجوده ڪيسن تي لاڳو ٿين ٿا ۽ جيڪڏهن آرٽيڪل 63 (جي) ۽ (ايڇ) جهڙين آئيني شقن جي تشريح جي ضرورت پوي ته ان جو تعين آخرڪار اليڪشن ڪميشن ۽ عدالتون ڪنديون. وفاقي وزير چيو ته فوجداري قانون ۾ ڌار ڌار ٽرائل ٿي سگهن ٿا جيڪڏهن هر معاملي ۾ نتيجا يا شرڪت مختلف هجي. هن اڳوڻن وزيراعظمن بابت ڪيسن جي مثالن جو به ذڪر ڪيو جتي ڌار ڌار معاملن لاءِ ڪيترائي ريفرنس داخل ڪيا ويا. هن وڌيڪ چيو ته اڳوڻي وزيراعظم محمد نواز شريف اهڙن ڪيسن جو عدالتن ۾ قانون موجب مُنهن ڏنو. هن چيو ته پارليامينٽ جاري ڪيسن جي باري ۾ فيصلو ڪرڻ جو فورم ناهي، آئيني فريم ورڪ ۾ عدالتي آزاديءَ جو احترام ضروري آهي. هن چيو ته اسان جي ذميداري قانونسازيءَ جي عمل کي بهتر بڻائڻ ۽ سينيٽ ۾ سازگار ماحول کي يقيني بڻائڻ آهي.
