اسلام آباد – 29 آگسٽ (اي پي پي) وزيراعظم محمد شهباز شريف عوامي جمهوريه چين جي صدر شي جن پنگ جي دعوت تي 30 آگسٽ کان 4 سيپٽمبر 2025ع تائين چين جو سرڪاري دورو ڪندو. وزيراعظم پنهنجي دوري دوران تيانجن ۾ ٿيندڙ شنگهائي تعاون تنظيم (ايس سي او) جي ملڪي سربراهن جي اجلاس ۾ پاڪستان جي نمائندگي ڪندو. پرڏيهي آفيس پاران جاري بيان موجب وزيراعظم محمد شهباز شريف چين جي دوري دوران عوامي جمهوريه چين جي صدر شي جن پنگ ۽ وزيراعظم لي چيانگ سان جدا جدا ملاقاتون ڪندو جن ۾ پاڪستان ۽ چين جي وچ ۾ ٻطرفي تعاون جي مختلف رخن تي خيالن جي ڏي وٺ ڪئي ويندي جن ۾ اقتصادي حصيداري، سي پيڪ جي اڳئين مرحلي جي اڳڀرائي ۽ علائقائي ۽ عالمي معاملا شامل آهن. بيجنگ ۾ وزيراعظم محمد شهباز شريف ٻي جنگ عظيم جي فتح جي 80هين سالگرهه جي موقعي تي ٿيندڙ خصوصي فوجي پريڊ ۾ صدر شي جن پنگ ۽ ٻين عالمي اڳواڻن سان گڏ شرڪت ڪندو. وزيراعظم ناليواري چيني سيڙپڪارن، ڪاروباري شخصيتن ۽ ڪمپنين جي سربراهن سان پڻ ملاقات ڪندو ته جيئن پاڪ – چين واپاري ۽ اقتصادي لاڳاپن کي فروغ ڏئي سگهجي. هو بيجنگ ۾ منعقد ٿيندڙ پاڪ – چين بي ٽو بي سيڙپڪاري ڪانفرنس کي پڻ خطاب ڪندو. اهو دورو پاڪستان ۽ چين جي وچ ۾ اعليٰ سطحي قيادت جي مسلسل مٽاسٽا جو تسلسل آهي جيڪو ٻنهي ملڪن جي سدا بهار اسٽريٽجڪ تعاون تي ٻڌل حصيداري کي وڌيڪ گهرو ڪرڻ، سي پيڪ جي ٻئي مرحلي کي فروغ ڏيڻ ۽ اهم علائقائي ۽ عالمي معاملن تي ويجهو رابطو برقرار رکڻ جي اهميت کي اجاگر ڪري ٿو.
