جميڪا-06 آگسٽ (اي پي پي) پاڪستان ۽ ويسٽ انڊيز ڪرڪيٽ ٽيمن وچ ۾ ٽن هڪ ڏينهن وارين عالمي ميچن تي ٻڌل سيريز جو پهريون ون ڊي انٽرنيشنل ميچ 8 آگسٽ تي برائن لارا اسٽيڊيم تاروبا، ٽرينيڊاڊ ۾ کيڏيو ويندو، ميچ ڊي ۽ نائيٽ هوندو ۽ فلڊ لائيٽس جي روشني ۾ کيڏيو ويندو. پاڪستان جي ٽيم ون ڊي سيريز جي شروعات کان اڳ ڀرپور تيارين ۾ مصروف آهي. ٽيم ۾ شامل سمورا رانديگر بيٽنگ، بالنگ ۽ فيلڊنگ جي پريڪٽس دوران شاندار ڪارڪردگي جو مظاهرو ڪيو ۽ مختلف شاٽس کيڏيندي مشقون ڪيون ته جيئن مخالف ٽيم جي بالرن خلاف جارحاڻي حڪمت عملي اختيار ڪري سگهجي. ٻنهي ٽيمن وچ ۾ ون ڊي سيريز جو ڪرڪيٽ جا مداح بي چيني سان انتظار ڪري رهيا آهن. پاڪستان جي ڪرڪيٽ ٽيم هن وقت ويسٽ انڊيز جي دوري تي آهي جتي ميزبان ٽيم خلاف 3 ٽي ٽوئنٽي ميچ کيڏڻ کانپوءِ هاڻي ٽن ون ڊي انٽرنيشنل ميچن جي سيريز کيڏندي. سيريز ۾ پاڪستاني ٽيم جي اڳواڻي محمد رضوان ڪندو، سيريز جو پهريون ميچ 8 آگسٽ، ٻيو ميچ 10 آگسٽ، جڏهن ته ٽيون ۽ آخري ون ڊي ميچ 12 آگسٽ تي کيڏيو ويندو.
