اسلام آباد – 24 – جون (اي پي پي) وزيراعظم محمد شهباز شريف چيو آهي ته پاڪستان سي پيڪ منصوبن تي عملدرآمد جي لاءِ چين سان گڏجي ڪم جاري رکڻ جي لاءِ پرعزم آهي، چين پاران مالي ۽ اقتصادي مدد سان پاڪستان جي معيشت کي مستحڪم ڪرڻ ۾ مدد ملي جنهن جي نتيجي ۾ ملڪ جي ميڪرو اڪنامڪ آئوٽ لڪ ۾ بهتري آئي. وزيراعظم آفيس جي ميڊيا ونگ پاران جاري بيان موجب اهڙن خيالن جو اظهار وزيراعظم پاڪستان ۾ چين جي سفير جيانگ زيڊونگ سان ڳالهائيندي ڪيو جنهن ساڻس ملاقات ڪئي. وزيراعظم چيني صدر شي جن پنگ ۽ چين جي وزيراعظم لي ڪيانگ جي لاءِ نيڪ خواهشن ۽ ايندڙ ايس سي او سربراهي اجلاس جي ڪامياب انعقاد جي لاءِ نيڪ خواهشن جو اظهار ڪيو. هن سربراهي اجلاس ۾ شرڪت جي لاءِ پنهنجي چين جي دوري جي حوالي سان ٻنهي ملڪن جي وچ ۾ جاري مشاورت جو ذڪر پڻ ڪيو. وزيراعظم محمد شهباز شريف پاڪستان ۽ چين جي وچ ۾ تاريخي، گهري ۽ مضبوط ”آل ويدر اسٽريٽجڪ ڪوآپريٽو پارٽنرسپ“ جو ذڪر ڪندي چيو ته پاڪستان سي پيڪ جي جاري منصوبن جي ڪامياب لاڳو جي لاءِ چين سان گڏجي ڪم جاري رکڻ جي لاءِ پوري طرح پرعزم آهي. ان سلسلي ۾ هن اهم منصوبن بشمول ڪي ڪي ايچ، ايم ايل – ون ۽ گوادر پورٽ کي آپريشنل ڪرڻ سان گڏوگڏ زراعت، صنعت ۽ آءِ ٽي جي شعبن ۾ ٻنهي ملڪن جي وچ ۾ تعاون تي روشني وڌي. وزيراعظم چين پاران مالي ۽ اقتصادي مدد جي لاءِ پاڪستان پاران دل جي گهرائين سان دوست ملڪ چين کي ساراهيو جنهن سان پاڪستان جي معيشت کي مستحڪم ڪرڻ ۾ مدد ملي ۽ ان جي نتيجي ۾ ملڪ جي ميڪرو اڪنامڪ آئوٽ لڪ ۾ بهتري آئي. هن وڌيڪ چيو ته اهو حڪومت جي سماجي ۽ اقتصادي ترقي جي ايجنڊا جي لاءِ اهم آهي. ملاقات دوران علائقائي سلامتي جي صورتحال خاص طور تي ايران اسرائيل تڪرار ۾ تازي اڳڀرائي تي پڻ خيالن جي ڏي وٺ ڪئي وئي. چيني سفير ڳالهه ٻولهه ۽ سفارتڪاري جي ذريعي بحران جي پرامن حل جي لاءِ گڏيل قومن جي سلامتي ڪائونسل سميت هر سفارتي فورم تي پاڪستان جي فعال ۽ مثبت ڪردار کي ساراهيو. چيني سفير جيانگ زيڊونگ وزيراعظم کي پاڪ چين ٻطرفي تعاون جي مختلف رخن کان آگاهه ڪيو ۽ چيو ته آگسٽ 2025ع جي آخر ۾ وزيراعظم جي چين جي ايندڙ دوري جي ڪاميابي کي يقيني بڻائڻ جي لاءِ تياريون شروع ڪيون ويون آهن.
