اسلام آباد – 30 مئي (اي پي پي) پاڪستان جي پبلڪ پروڪيورمنٽ ريگيوليٽري اٿارٽي جو پبلڪ پروڪيورمنٽ رولز 2025ع جي مسودي تي رايا ۽ سفارشُون جوڙڻ لاءِ مشاورتي اجلاس پيپرا جي مئنيجنگ ڊائريڪٽر حسنات احمد قريشي جي صدارت ۾ ٿيو. اجلاس ۾ مختلف شعبن سان تعلق رکندڙ سپلائرز، وينڊرز ۽ واپاري تنظيمن جي نمائندن ڀرپور شرڪت ڪئي، جڏهن ته پاڪستان ڪائونسل آف آرڪيٽيڪچر اينڊ ٽائون پلانرز، ڪنسٽرڪشن ايسوسيئيشن آف پاڪستان، اسلام آباد چيمبر آف ڪامرس اينڊ انڊسٽري، اسلام آباد وومين چيمبر، اسلام آباد انڊسٽريل ايسوسيئيشن ۽ آل پاڪستان سيڪيورٽي ايجنسيز ايسوسيئيشن جي نمائندن سميت پيپرا جا سينيئر آفيسر موجُود هئا. پيپرا جي مئنيجنگ ڊائريڪٽر حسنات احمد قريشي نئين قاعدن ۽ ضابطن جي تفصيلن کان آگاهه ڪندي ٻڌايو ته نئين قانونن ۾ حڪومتي ادارن ۾ پروڪيورمنٽ سيلز جو قيام، ٿرڊ پارٽي ايويليوايشن، شڪايتن جي ازالي جي نظام، پروڪيورمنٽ جي طريقيڪار ۾ جدت، ٺوس معاهداتي نظم ۽ نيشنل بليڪ لسٽنگ سسٽم جهڙا سڌارا شامل آهن ته جيئن شفافيت، احتساب ۽ ڪارڪردگي کي يقيني بڻائي سگهجي.
هن ٻڌايو ته اي پاڪ ايڪوزيشن اينڊ ڊسپوزل سسٽم يعني اي پيڊز مڪمل طور تي وفاقي ادارن سميت سنڌ، خيبرپختونخواهه ۽ پنجاب جي حڪومتي ادارن ۾ لاڳو ٿي چڪو آهي، جيڪو 10 هزار کان وڌيڪ سرڪاري ادارن ۽ 30 هزار کان وڌيڪ رجسٽرڊ سپلائرز جي ضرورتن کي پورو ڪري رهيو آهي. اهو نظام منصوبابندي کان وٺي ادائيگي تائين جي سمورين پروڪيورمنٽ سرگرمين کي خودڪار بڻائي ٿو، جنهن سان انساني مداخلت ۾ خاطرخواهه گهٽتائي آئي آهي. حسنات قريشي چيو ته جيڪڏهن ڪنهن نظام ۾ ديانتداري نه هجي ته ان جي ڪا حيثيت نٿي رهي. هن شرڪت ڪندڙن کي آگاهه ڪيو ته اي پيڊز جي مڪمل سيڪيورٽي آڊٽ کانپوءِ ان کي محفوظ ۽ قاعدن ۽ ضابطن جي عين موجب قرار ڏنو ويو آهي. هن وڌيڪ ٻڌايو ته پيپرا عوامي شعبي جي ماهرن، سپلائرز ۽ وينڊرز جي تربيت جي لاءِ جامع پروگرام شروع ڪيو آهي ته جيئن سرڪاري خريدارين ۾ غلطي جي گنجائش ۾ گهٽتائي ۽ صلاحيتن ۾ اضافو ممڪن ٿي سگهي. هن شرڪت ڪندڙن کي ان موقعي مان ڀرپور فائدو کڻڻ جي ترغيب ڏني. اجلاس دوران شرڪت ڪندڙن ٻوليءَ جائزي جي اصول، اي پروڪيورمنٽ جي نظام، ان جي لاڳو ۾ درپيش چئلينجز ۽ ٻين معاملن تي قيمتي تجويزون پيش ڪيون. هن ان ڳالهه تي زور ڏنو ته نوان قاعدا عوامي ادارن سان گڏوگڏ نجي شعبي جي مفادن جو پڻ تحفظ ڪن. ايم ڊي پيپرا شرڪت ڪندڙن کي هدايت ڪئي ته اهي پنهنجون تجويزون لکت ۾ جمع ڪرائين ته جيئن انهن کي پبلڪ پروڪيورمنٽ رولز 2025ع جي حتمي مسودي ۾ شامل ڪري سگهجي.
