گڏيل قومون-25 آڪٽوبر (اي پي پي) پاڪستان گڏيل قومن جي امن ڪاررواين ۾ عورتن جي ڪردار کي وڌائڻ جي پنهنجي مضبوط ارادن جو ورجاءُ ڪندي مطالبو ڪيو آهي ته فلسطين ۽ ڀارت جي غير قانوني قبضي هيٺ ڄمون ڪشمير ۾ غير ملڪي قبضي ۾ عورتن ۽ ڇوڪرين جي مصيبتن کي ختم ڪرڻ جي ضرورت آهي. گڏيل قومن ۾ پاڪستان جي مستقل نمائندي منير اڪرم گڏيل قومن جي سلامتي ڪائونسل ۾ عورتن، امن ۽ سلامتي جي موضوع تي مباحثي ۾ ٻڌايو ته عورتن ۽ ڇوڪرين خلاف سڀ کان وڌيڪ سنگين خلاف ورزيون غير ملڪي قبضي جي حالتن ۾ ٿيون آهن ڇاڪاڻ ته قبضي جو هڪ مقصد والاريل آبادي کي محڪوم بڻائڻ هوندو آهي، جنهن ۾ عورتون ۽ ڇوڪريون سڀ کان وڌيڪ غير محفوظ هونديون آهن. پاڪستان نمائندي چيو ته اها صورتحال ڀارت جي غير قانوني قبضي هيٺ ڄمون ڪشمير جي آهي جتي 1990ع کان هڪ لک کان وڌيڪ ڪشميري مرد، عورتون ۽ ٻار شهيد ڪيا ويا، ان سلسلي ۾ هن سلامتي ڪائونسل کان مطالبو ڪيو ته هو پرڏيهي قبضي ۾ عورتن ۽ ڇوڪرين جي سنگين ۽ ناقابل قبول صورتحال جي خاتمي لاءِ قدم کڻي. ان بحث ۾ 60 کان وڌيڪ مقررن حصو ورتو ۽ امن جي عمل ۾ عورتن جي شموليت ۽ برابري جي بنياد تي فيصلا سازي ۾ حصو وٺڻ تي زور ڀريو. هن چيو ته پاڪستان پهريون ملڪ آهي جنهن گڏيل قومن جي سيڪريٽري جنرل جي گڏيل واعدن جي پڌرنامي جي توثيق ڪئي جنهن ۾ عورتن، امن ۽ سلامتي جي گڏيل قومن جي امن فوج کي مضبوط بڻائڻ لاءِ مرڪزي ترجيح طور شناخت ڪئي وئي، هن ان ڳالهه جي نشاندهي ڪئي ته ملڪ جي سياسي عزم کي عملي قدمن سان هم آهنگ ڪيو ويو آهي. هن چيو ته پرڏيهي قبضي تحت ڪشمير، فلسطين ۽ ٻين هنڌن تي عورتن جي تڪليفن کي ختم ڪرڻ لاءِ امن ۽ سلامتي جي ايجنڊا کي ترجيح ڏيڻ گهرجي.
