اسلام آباد – 23 – اپريل (اي پي پي) وزيراعظم محمد شهباز شريف چيو آهي ته معياري تعليم جو فروغ اسان جي حڪومت جي اولين ترجيح آهي، اسان جي ڀرپور ڪوشش آهي ته ڪو به ٻار اسڪول کان ٻاهر نه هجي، ان حوالي سان وفاقي حڪومت صوبائي حڪومتن سان گڏجي ڪم ڪري رهي آهي، پاڪستان ۽ برطانيا جا لاڳاپا ڏهاڪن تي ٻڌل آهن جن ۾ وقت سان گڏوگڏ وڌيڪ بهتري اچي رهي آهي، اسان برطانيا سان واپار ۽ تعليم جي شعبن ۾ تعاون وڌائڻ جا خواهشمند آهيون. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف سان برطانيا جي ناليواري يونيورسٽين جي نمائندن جي وفد اسلام آباد ۾ ملاقات ڪئي. وفد جي قيادت برطانيا جي انٽرنيشنل ايجوڪيشن چيمپئن سر اسٽيو سمٿ ڪري رهيو هو. ملاقات ۾ تعليم وارو وفاقي وزير خالد مقبول صديقي، قومي اسيمبلي ميمبر رومينه خورشيد عالم، وزيراعظم جو خاص معاون طارق فاطمي، پاڪستان ۾ برٽش ڪائونسل جو ڪنٽري ڊائريڪٽر جيمز هيمپسن، چيئرمين هايئر ايجوڪيشن ڪميشن ۽ لاڳاپيل اعليٰ سرڪاري آفيسر پڻ موجود هئا. وزيراعظم وفد کي پاڪستان ۾ ڀليڪار چيو. وفد سان ڳالهائيندي وزيراعظم چيو ته معياري تعليم جو فروغ اسان جي حڪومت جي اولين ترجيح آهي. هن چيو ته اسان جي ڀرپور ڪوشش آهي ته ڪو به ٻار اسڪول کان ٻاهر نه هجي، ان حوالي سان وفاقي حڪومت صوبائي حڪومتن سان گڏجي ڪم ڪري رهي آهي. وزيراعظم چيو ته اسان پنجاب صوبي ۾ ايجوڪيشن اينڊومينٽ فنڊ قائم ڪيو هو، اهڙي ئي قسم جا قدم وفاق ۾ پڻ کڻنداسين. هن چيو ته تعليم جي شعبي جي ترقي جي لاءِ حڪومت هنگامي قدم کڻي رهي آهي. وزيراعظم چيو ته پاڪستان ۽ برطانيا جا لاڳاپا ڏهاڪن تي ٻڌل آهن جن ۾ وقت سان گڏوگڏ وڌيڪ بهتري اچي رهي آهي. وزيراعظم پاڪستان ۾ تعليم جي شعبي ۾ برطانوي تعاون کي ساراهيندي چيو ته اسان برطانيا سان واپار ۽ تعليم جي شعبن ۾ تعاون وڌائڻ جا خواهشمند آهيون. وزيراعظم چيو ته پاڪستاني ۽ برطانيا جي يونيورسٽين جي وچ ۾ ٽيڪنالاجي ۽ تحقيق جي شعبن ۾ حصيداري ٿيڻ گهرجي. هن وڌيڪ چيو ته برطانيا پاڪستاني استادن جي تربيت ۽ صلاحيت ۾ اضافي جي حوالي سان مددگار ثابت ٿي سگهي ٿو. سندس چوڻ هو ته پاڪستان برطانيا جي ايجوڪيشن سيڪٽر جي صلاحيت مان فائدو کڻڻ چاهي ٿو. وزيراعظم چيو ته اها ڳالهه خوش آئنده آهي ته پاڪستاني ۽ برطانوي يونيورسٽيون ريسي پروڪل بنيادن تي ڊگري پروگرامز شروع ڪري چڪيون آهن. سندس چوڻ هو ته پاڪستان ۾ اعليٰ تعليم جي فروغ ۽ ان جو معيار بهتر بڻائڻ جي لاءِ برطانيا جي ايجوڪيشن سيڪٽر سان گڏجي ڪم ڪرڻ چاهيون ٿا. هن چيو ته جديد تعليم خاص طور تي سائنس ۽ ٽيڪنالاجي ڪنهن به قوم جي ترقي جي ضمانت آهي. وفد برطانيا ۽ پاڪستان جي وچ ۾ اعليٰ تعليم جي شعبي ۾ حصيداري ۽ تعاون جي حوالي سان گهري دلچسپي جو اظهار ڪيو. وفد پاران وزيراعظم کي آگاهه ڪيو ويو ته ايجوڪيشن گيٽ وي پاڪستان جو دائرو وڌيڪ وڌايو پيو وڃي جنهن سان ٻنهي ملڪن ۾ تعليم جي شعبي ۾ تعاون وڌائڻ ۾ مدد ملندي. وفد پاڪستان ۾ شاندار ميزباني تي وزيراعظم ۽ حڪومتي ادارن جا ٿورا مڃيا.
