لنڊن- 15 ڊسمبر (اي پي پي) سعودي عرب ۾ اليڪٽرانڪ گاڏيون ٺاهيندڙ آمريڪي ڪمپني لوسيڊ 800 اليڪٽرانڪ ڪارون اسمبل ڪري ڇڏيون آهن، ميڊيا رپورٽن موجب آمريڪي رياست ڪيليفورنيا ۾ قائم لوسيڊ ڪار مينوفيڪچرنگ ڪمپني جي وچ اوڀر لاءِ مينجنگ ڊائريڪٽر صحافين سان ڳالهائيندي چيو ته ڪمپني آمريڪا کان ٻاهر پنهنجي پلانٽ جو افتتاح سيپٽمبر ۾ ڪيو هو، هن چيو ته ڪنگ عبدالله اڪنامڪ سٽي ۾ لڳايل پلانٽ ۾ هڪ سال اندر 5000 الڪٽرانڪ گاڏيون تيار ڪرڻ جي صلاحيت موجود آهي. لوسيڊ ڪمپني جي ڊپٽي چيئرمين فيصل سلطان چيو ته اليڪٽرڪ ڪار مڪمل طور تي ايريزونا ۾ تيار ٿيندي آهي ۽ پوءِ ڊي اسمبل ڪري ملڪ جي پلانٽ تي پهچندي آهي جٿي ان کي ٻيهر اسمبل ڪيو ويندو آهي. هن چيو آهي ته جده ويجهو ڪنگ عبدالله اڪنامڪ سٽي ۾ قائم ڪيل فيڪٽري ۾ ڪارڪن گاڏي کي مڪمل طور تي اسمبل ڪرڻ کان پوءِ بيٽري کي ٻيهر جوڙي ٽائر ٻيهر لڳائن ٿا ۽ گاڏي جي ٻيهر جاچ ڪئي ويندي آهي. لوسيڊ ڪمپني جي ڊپٽي چيئر مين ٻڌايو ته ملڪ ۾ 2026 ۾ مڪمل يونٽ نصب ڪيو ويندو.
