ڪراچي – 26 – جولاءِ (اي پي پي) وزيراعظم محمد شهباز شريف چيو آهي ته پاڪستان ڏيوالو ٿيڻ جي خطري مان نڪري ويو آهي، جادو ٽوڻا ڪندڙ ۽ ڦُوڪون هڻندڙ ملڪ جا بدخواهه ناڪام ٿي ويا آهن، ترقي جي لاءِ ڪرپشن، بجلي ۽ گئس چوري جو خاتمو ڪرڻو پوندو، نوجوانن کي هنرمند ۽ بااختيار بڻائڻو پوندو، ايندڙ چونڊن ۾ موقعو مليو ته صوبن سان گڏجي باصلاحيت نوجوانن ۾ هر سال 10 لک ليپ ٽاپ ورهائينداسين. اهڙن خيالن جو اظهار هن وزيراعظم ليپ ٽاپ اسڪيم ۽ وزيراعظم يوٿ بزنس لونز تحت چيڪ ورهائڻ واري تقريب کي خطاب ڪندي ڪيو. ان موقعي تي اطلاعات ۽ نشريات واري وفاقي وزير مريم اورنگزيب، انفارميشن ٽيڪنالاجي وارو وفاقي وزير امين الحق، توانائي وارو وفاقي وزير انجنيئر خرم دستگير، سنڌ جو گورنر ڪامران ٽيسوري، سنڌ جو وڏو وزير سيد مراد علي شاهه، وزيراعظم جي نوجوانن جي معاملن واري خاص معاون شزه فاطمه ۽ صوبائي وزيرن کانسواءِ شاگردن ۽ شاگردن جو وڏو انگ موجود هو. تقريب کي خطاب ڪندي وزيراعظم چيو ته نوجوانن ۾ ليپ ٽاپ ورهائڻ ۽ انهن کي بااختيار بڻائڻ جي تقريب ۾ شرڪت منهنجي لاءِ خوشي جوڳي آهي. سنڌ جي وڏي وزير صوبي ۾ ليپ ٽاپ جي ورڇ ۽ ترقياتي وسيلا فراهم ڪرڻ جي لاءِ ڪوششون ڪيون آهن. سنڌ جي گورنر گورنر هائوس ۾ نوجوانن جي لاءِ شاندار پروگرام شروع ڪيو آهي جيڪو ساراهه جوڳو آهي. ليپ ٽاپ حاصل ڪندڙ شاگردن ۽ شاگردياڻين جي اڪثريت جو تعلق صوبي جي مختلف علائقن سان آهي. نوجوانن کي تعليم سان ليس ڪرڻ جي لاءِ جيترا به وسيلا فراهم ڪرڻ جي ضرورت آهي ڪرڻ گهرجن، ان سان ملڪ تيزي سان ترقي جي راهه تي گامزن ٿيندو. اسان فري لانسنگ جي لاءِ پروگرام جي شروعات ڪئي آهي. پاڪستان جا نوجوان انتهائي باصلاحيت آهن. قوم کي اڳتي وڌائڻ جي لاءِ نوجوانن کي هنرمند ۽ بااختيار بڻائڻو پوندو. وزيراعظم چيو ته محدود وسيلن ۾ باصلاحيت نوجوانن پاران صلاحيتن جو مظاهرو ڪرڻ تمام اهم آهي. پاڪستاني نوجوانن ۾ تمام گهڻي صلاحيت آهي، اسان کي انهن جي صلاحيت کي نکارڻو آهي. نوجوانن کي اڳتي وڌڻ جي لاءِ موقعا فراهم ڪرڻا پوندا. هن چيو ته ايندڙ مهيني موجوده حڪومت جو مدو پورو ٿي رهيو آهي. هڪ لک ليپ ٽاپ 23 – 2022ع جي بجيٽ جو حصو آهي. هلندڙ مالي سال جي بجيٽ ۾ به نوجوانن کي هڪ لک ليپ ٽاپ ميرٽ تي ڏنا ويندا. ان جي لاءِ ڪنهن سفارش، پنهنجا نوازي جي ضرورت نه آهي. تعليم ئي ۽ ميرٽ ئي ليپ ٽاپ حاصل ڪرڻ جو معيار آهي. سرڪاري تعليمي ادارن جي شاگردن جي لاءِ اسان اها اسڪيم شروع ڪئي آهي. ايندڙ چونڊن ۾ اسان کي موقعو مليو ته عوام جي ڀلائي لاءِ وڌيڪ قدم کنيا ويندا. صوبن جي مدد سان هر سال 5 کان 10 لک ليپ ٽاپ ڏني ويندا. نوجوانن کي جيڪڏهن سهولتون فراهم ڪريون ته اهي نوجوان جيڪي اسان جي مستقبل جي ضمانت آهن ملڪ جي لاءِ اربين ڊالر ڪمائي آڻي سگهن ٿا. يوٿ لون اسڪيم تحت سڄي ملڪ جي نوجوانن ۾ 30 ارب رپيا ورهايا ويا آهن. ان تي اسان بئنڪن جي تعاون جا ٿورائتا آهيون. جيڪڏهن اسان ننڍي ۽ وچولي درجي جي صنعتن جي لاءِ قرضن جي ورڇ جو نظام نه جوڙيو ته پوءِ ترقي نه ٿي ٿي سگهي. بئنڪون وڏن وڏن ڪاروباري ادارن کي قرض ڏين ٿيون. بئنڪن جي لاءِ اها ڳالهه لازمي ڪري ڇڏڻ گهرجي ته ننڍن آبادگارن ۽ دڪاندارن جي لاءِ قرض جي رقم جو خاص حصو مخصوص ڪن. اسان کي ننڍي ۽ وچولي درجي جي صنعتن جي سهولت جو انتظام ڪرڻو پوندو. وزيراعظم چيو ته اڳوڻي حڪومت 3 ارب ڊالر 4 سيڪڙو جي شرح سان وڏن وڏن ڪاروباري ماڻهن کي ڏنا ويا. انهن ٻارن، ننڍن آبادگارن ۽ ننڍي ڪاروبار ڪندڙن جو خيال ڇو نه رکيو ويو. ملڪ جي تيز رفتار ترقي جي لاءِ اسان کي ان طرف ڌيان ڏيڻو پوندو. وزيراعظم چيو ته هن تقريب ۾ اسان کي قومي يڪجهتي جو ڀرپور اظهار نظر اچي رهيو آهي. اها تمام سٺي ڳالهه آهي. ملڪ کي اڳتي وٺي وڃڻ جي لاءِ اسان کي گڏجي ڪوششون ڪرڻيون پونديون. پاڪستان ڊيفالٽ جي خطري مان نڪري چڪو آهي. جادو ٽوڙا ڪندڙ ۽ ڦُوڪون هڻندڙ ملڪ جا بدخواهه ناڪام ٿي ويا آهن. هاڻي اسان کي اڳتي جي طرف وڃڻو آهي. هاڻي اسان کي معاشي ترقي جي لاءِ سڌارا ڪرڻا آهن ۽ معيشت کي بهتر بڻائڻو آهي. معاشي ترقي جي لاءِ اسان کي بنيادي سڌارا آڻڻا آهن. ملڪ جي ترقي جي لاءِ ڪرپشن، بجلي ۽ گئس چوري جو خاتمو ڪرڻو پوندو، تڏهن پاڪستان هڪ عظيم ملڪ بڻجندو. عرب نيوز ۾ هڪ آرٽيڪل مون پڙهيو آهي جنهن ۾ لکيو ويو آهي ته آءِ ايم ايف سان معاهدي کانپوءِ پاڪستان ۾ اهڙيون حالتون پيدا ٿي رهيون آهن جنهن سان ملڪ ترقي جي رستي تي گامزن ٿيڻ وڃي رهيو آهي. پاڪستاني نوجوان محدود وسيلن ۾ به نمايان ڪارناما سرانجام ڏئي رهيا آهن. نوجوانن کي سهولتون ڏئي ئي ملڪي ترقي ممڪن آهي. ايس آءِ ايف سي پاڪستان کي ترقي جي منزل تائين وٺي ويندو. ان موقعي تي سنڌ پوليس جي دستي شاگردن ۽ شاگردياڻين کي گارڊ آف آرنر پڻ پيش ڪيو.
