اسلام آباد – 15 آگسٽ (اي پي پي) قومي اسيمبلي ۾ اڳوڻي مخالف ڌر اڳواڻ سيد خورشيد احمد شاهه نئين چونڊيل اسپيڪر اسد قيصر کي مبارڪباد ڏيندي چيو آهي ته هي هن ملڪ جي خودمختيار پارليامينٽ آهي ۽ ان کي قائم رکڻ جي لاءِ پيپلزپارٽي جي اڳواڻن پنهنجي جانين جو نذرانو پيش ڪيو آهي. قومي اسيمبلي ۾ خيالن جو اظهار ڪندي هن چيو ته پنهنجي پارٽي ۽ ايوان جي طرفان نئين چونڊيل اسپيڪر کي مبارڪباد پيش ڪريون ٿا، اسان پوري ڪوشش ڪنداسين ته هن پارليامينٽ جو تقدس بحال رکون، هن ملڪ ۾ جمهوريت شهيد محترمه بينظير ڀٽو جي شهادت سبب اسان کي نظر اچي ٿي جنهن کي اسان قائم رکنداسين، اسان کي ماضي جو تلخ تجربو آهي ماضي ۾ ڪوششون ڪيون ويون هيون ته پارليامينٽ پنهنجو مدو پورو نه ڪري پر پارليامينٽ ۽ هن وقت اپوزيشن جمهوريت کي قائم رکڻ ۾ پنهنجو ڀرپور ڪردار ادا ڪيو.
