اسلام آباد – 28 جنوري (اي پي پي) ناڻي واري وفاقي وزير سينيٽر اسحاق ڊار جي صدارت ۾ ناڻي واري وزارت ۾ قرضن جي انظام ۽ انصرام جي حوالي سان اجلاس ٿيو. ڊيٽ جي ڊائريڪٽر جنرل ناڻي واري وزير کي قرضن جي انظام ۽ انصرام بابت تفصيلي بريفنگ ڏني. هن گذريل ٽن سالن دوران ڊيٽ پاليسي ڪوآرڊينيشن آفيس ۾ آندل سڌارن کان آگاهه ڪيو. هن ٻڌايو ته جديد ٽيڪنالاجي ۽ طريقو اختيار ڪرڻ سان ڊيٽ مئنيجمينٽ ۾ شفافيت ۽ ڪارڪردگي بهتر ٿي آهي. ان موقعي تي اسحاق ڊار چيو ته موجوده حڪومت جي دور ۾ سرڪاري قرضن جي پروفائيل ۾ بهتري ٿي آهي. هن چيو ته عالمي ڪريڊٽ ريٽنگ ايجنسين پاڪستان جي ڪريڊٽ ريٽنگ ۾ بهتري جو اعتراف ڪيو آهي.
