اسلام آباد-17 مارچ (اي پي پي( سينيٽ جي گولڊن جوبلي اجلاس جمعي ڏينهن ختم ٿي ويو، اجلاس ۾ پاڪستان کي متحد، مستحڪم ۽ مضبوط بڻائڻ لاءِ جمهوريت، قانون جي حڪمراني، گڊ گورننس ۽ پارليامينٽ جي بالادستي لاءِ پنهنجي عزم جو ورجاءُ ڪيو ويو. اجلاس جي آغاز تي لاڏاڻو ڪري ويل سينيٽرن لاءِ فاتحه خواني ڪئي وئي. سينيٽ جي يادگاري اجلاس ۾ خيالن جو اظهار ڪندي سينيٽ چيئرمين محمد صادق سنجراڻي چيو ته هيءَ وڏي فخر جي ڳالهه آهي ته اڌ صدي اڳ قائم ٿيل هي شاندار فورم اڄ جمهوريت، هم آهنگي ۽ قومي يڪجهتي جي علامت طور تي بلند ۽ مشهور آهي. هن موجوده ميمبرن، اڳوڻن سينيٽرن، قومي اسيمبلي جي اسپيڪر، سنڌ، بلوچستان ۽ خيبرپختونخوا جي گورنرز، وڏن وزيرن، بلوچستان اسيمبلي جي اسپيڪر، آزاد ڄمون ۽ ڪشمير جي وزيراعظم، گلگت بلتستان اسيمبلي جي اسپيڪر، پاڪستان ۾ مقرر مختلف ملڪن جي سفيرن، هاءِ ڪمشنرن، عالمي ادارن جي نمائندن جهڙوڪ ورلڊ بئنڪ، چيمبر آف ڪامرس اينڊ انڊسٽريز جي صدرن، بار ڪائونسلز جي عهديدارن ۽ ميڊيا هائوسز جي مالڪن جنهن سيشن ۾ شرڪت ڪئي ۽ هن ايوان ۽ قوم لاءِ پنهنجي جذبن جو اظهار ڪيو، انهن جو شڪريو ادا ڪيو. سينيٽ چيئرمين وزيراعظم محمد شهباز شريف جي به واکاڻ ڪئي ته هن پنهنجي موجودگي ۽ بصيرت انگيز خطاب سان تقريبن کي يادگار بڻايو، هن قانون ۽ انصاف واري وفاقي وزير سينيٽر اعظم نذير تارڙ ۽ قانون ۽ انصاف واري مملڪتي وزير سينيٽر شهادت اعواڻ جو ٿورو مڃيو جنهن انهن تقريبن ۾ پوري سرگرمي سان حصو ورتو. هن چيو ته سينيٽ ۾ پهريون ڀيرو عورت مخالف ڌر اڳواڻ ۽ تجربيڪار پارليامينٽرين سينيٽر شيري رحمان جو خصوصي اجلاس ۾ ڪردار به واکاڻ جوڳو آهي، قائد ايوان ۽ ناڻي وارو وزير سينيٽر محمد اسحاق ڊار ميزبان طور خدمتون سرانجام ڏنيون ۽ مهمانن جي استقبال لاءِ موجود رهيا ۽ ٻن ڏينهن جي ڪارروائي جو آغاز پڻ ڪيو. سينيٽ جي گولڊن جوبلي جي موقعي تي خصوصي يادگاري سڪي جي ڊزائين ۾ به سندس ڪردار اهم هو، هن يادگاري سڪي لاءِ پاڪستان منٽ، يادگاري ٽپال ٽڪلي جاري ڪرڻ تي پاڪستان پوسٽ، سينيٽ گولڊن جوبلي نغمه لکڻ، ڪمپوز ڪرڻ ۽ ڳائڻ لاءِ پرڏيهي وزارت جي ايڊيشنل سيڪريٽري شڪيل اصغر ۽ ان خاص موقعي تي دنيا جي سڀ کان ڊگهي لائيو واٽر ڪلر پيٽنگ تي آرٽ ايگزيبيٽر ناصر جاويد کي به ساراهيو. سينيٽ چيئرمين اهو به اعلان ڪيو ته سينيٽ جي ڪميٽي آف هول هڪ مستقل خصوصيت هوندي جيڪا ملڪ کي درپيش چئلينجن تي ڳالهين لاءِ ترجيحي هر ٽن مهينن ۾ منعقد ڪئي ويندي جيڪا وفاقي ٿنڀن سان گڏوگڏ پاڪستان جي عوام جي خواهشن موجب امڪاني حل تي سمورن اسٽيڪ هولڊرز وچ ۾ صحتمند گفتگو ڪندي، مثبت ۽ تنقيدي سوچ کي هٿي ڏيندي ۽ آواز بلند ڪندي. سينيٽ چيئرمين صادق سنجراڻي گذريل 50 سالن ۾ سينيٽ جي ڪيترين ئي ڪاميابين، اڳڀرائين ۽ ڪاميابين تي غُور ڪرڻ لاءِ هڪ پل ڪڍڻ جي اهميت تي زور ڀريو، هن نصاب جي سڌاري جي ضرورت تي زور ڀريندي چيو ته جيتوڻيڪ چئلينج موجود آهن، هي وقت آهي ته اسان پنهنجي ماضي جي غلطين مان سبق سکي اڳتي وڌون، هن وفاق کي مضبوط بڻائڻ ۽ رنگارنگي نسلن ۽ خطن جي ماڻهن کي تعلق، برابري ۽ برابري جو احساس ڏيارڻ لاءِ ملڪ جي عزم جي تجديد ڪئي. هن ننڍن صوبن جي ماڻهن کي قومي ڌارا ۾ آڻڻ، انهن جي بنيادي ضرورتن کي پورو ڪرڻ ۽ عدم اطمينان، محرومي ۽ محرومين کي ختم ڪرڻ لاءِ ڪوششون جاري رکڻ جي ضرورت تي زور ڀريو. هن چيو ته هن قومي ڪوشش ۾ اسان سڀني کي متحد ٿي هڪ ٿيڻ گهرجي، اسان کي سمورن وفاقي اڪاين جي ضرورت آهي، جيڪي هم آهنگي جي جذبي سان گڏ قومي ترقي ۽ اڳڀرائي جي مقصد ۾ مڪمل طور تي حصو وٺن. هن وڌيڪ چيو ته ايگزيڪيٽو، پارليامينٽ، عدليه، ميڊيا، سول سوسائيٽي ۽ هر ماڻهو کي قومي ترقي ۽ اڳڀرائي لاءِ هٿ ملائڻ گهرجي. پاڪستان جي مستقبل جي حوالي سان ۽ ترقي پسنداڻي نوعيت تي روشني وجهندي هن چيو ته مشڪل فيصلا ڪرڻ گهرجن پر اڪثر مشڪل ترين رستا ئي خوبصورت منزلن طرف وٺي ويندا آهن. ان کانپوءِ سينيٽ چيئرمين سينيٽ جي گولڊن جوبلي اجلاس اڻ ڄاتل مدي تائين ملتوي ڪري ڇڏيو.
