اسلام آباد – 25 – نومبر (اي پي پي) پرڏيهي وزير مخدوم شاهه محمود قريشي چيو آهي ته پاڪستان هڪ پرامن، مستحڪم، خودمختيار، خوشحال ۽ وحدت رکندڙ افغانستان جي حمايت جاري رکندو جيڪو علائقائي امن، ترقي ۽ خوشحالي ۾ حصيدار هجي، معاشي ترقي جي مختلف مرحلن ۾ هجڻ جي باوجود ايس – سي – او جا سمورا ميمبر ملڪ هاڻي به غربت، غذائي تحفظ ۽ ماحولياتي تبديلي جهڙن خطرن کي منهن ڏئي رهيا آهن. ان گهڻي رخي مسئلن مان اجتماعي انداز سان ئي منهن ڏئي سگهجي ٿو. هو ايس سي او جي حڪومتي سربراهن جي ڪائونسل جي اجلاس کي خطاب ڪري رهيو هو، هن ايس سي او خطي جي عوام جي ترقي ۽ خوشحالي لاءِ وزيراعظم عمران خان پاران نيڪ تمنائن جو پيغام پيش ڪندي چيو ته مجلس متحد علائقائي تنظيم جي طور تي ايس سي او عالمي برادري ۾ هڪ نمايان مقام رکي ٿي، گڏيل تعاون ۽ تڪرارن جي حل تي زور ڏئي ايس سي او هڪ اهڙي دنيا ۾ انسانيت کي اميد جو پيغام ڏئي رهي آهي جتي مقبوليت پسندي ۽ اجتماعيت سان ڪٽجي هلڻ جي روش، تيزي سان فروغ وٺي رهي آهي، ايس سي او معيشت، سلامتي، جي حوالي سان رابطا جوڙڻ ۽ پائيدار ترقي سميت مختلف شعبن ۾ رياستن جي وچ ۾ تعاون جو هڪ پرڪشش موقعو فراهم ڪندو آهي، اهو گڏيل خوشحالي ۽ گڏيل ترقي ۽ واڌ ويجهه جو هڪ قابل تقليد مثال آهي، هن چو ته هلندڙ سال سربراهي اجلاس ايس سي او جي قيام جي 20 هين سالگرهه تي منعقد ٿي رهيو آهي، اهو مرحلو اسان کي جائزي ۽ اجتماعي طور تي خطي ۾ امن ۽ ترقي جي مستقبل جي راهه تيار ڪرڻ جو موقعو فراهم ڪندو آهي، دوشنبي ۾ ايس سي او ملڪي ۽ حڪومتي سربراهن جي اجلاس ۾ مساوات، سياسي، معاشي ۽ سماجي ۽ ثقافتي راهه چونڊڻ جي حق جي احترام تهذيبن ۾ ڳالهه ٻولهه جي فروغ ۽ خطي ۾ هم آهنگي جي اصولن تي ثابت قدمي سان عمل پيرا رهڻ جو وچن ورجايو ويو هو. ايس سي او جي اڳواڻن سماجي ۽ معاشي ترقي ۾ تعاون جي ڳانڍاپي سان ترقي جي شرح ۽ خوشحالي کي ممڪن بڻائڻ جي وچن کي ورجايو هو. اڳواڻن ماسڪو، بشڪيڪ ۽ چنگدا ۾ ٿيندڙ اڳوڻين ملاقاتن جي نتيجي ۾ دوشنبي جي اعلان کي حتمي شڪل ڏني هئي. هن چيو ته علائقائي سلامتي اسان جي خطي ۾ خوشحالي ۽ معاشي ترقي جي اسان جي اجتماعي ويزن جي خواب کي تعبير ڪرڻ لاءِ لازم آهي. ان ڏس ۾ اسان جي جاگرافيائي مجبورين ۽ افغانستان جي عوام سان اسان جي دائمي رشتن جي ڪري افغانستان ۾ استحڪام اسان سڀني جي لاءِ وڏي اهميت رکي ٿو گذريل ڪجهه مهينن ۾ افغانستان ۾ بنيادي تبديلي آئي آهي، افغان عوام کي اڄ شديد معاشي ۽ انساني نويت جا مسئلا درپيش آهن عالمي برادري کي افعان عوام جي تڪليفن کي ختم ڪرڻ لاءِ تعميري انداز ۾ رابطا رکڻ جي ضرورت آهي. پاڪستان افعان ڀائرن جي هن مشڪل وقت ۾ مدد جاري رکيو اچي. پاڪستان صحت، تعليم ۾ مدد افعانستان مان ايندڙ شين جي لاءِ واپاري لنگهه ۾ سهولتن جي اضافي ۽ افغان مصنوعات تي ٽيرف جي خاتمي جهڙن قدمن وسيلي افعانستان جي سماجي ۽ معاشي ترقي ۾ پنهنجو حصو وجهي رهيو آهي، افغانستان جي حوالي سان اسان پنهنجي عالمي ۽ علائقائي شراڪتدارن سان رابطا به جاري رکيو اچون، تازو ئي اسان اسلام آباد ۾ ٽرائيڪا پلس جي ميزباني ڪئي ۽ تهران ۾ افغانستان جي پاڙيسرين جي وزارتي سطح جي اجلاس ۾ شرڪت ڪئي. اسان پنهنجي حصيدارن ۽ اشتراڪ جي عمل سان افغانستان سان معاملا جاري رکنداسين ته جيئن اجتماعي قدرن کي هٿي ملي. سڀني افغانين جي حقن جو احترام هجي ۽ ان ڳالهه کي يقيني بڻايو وڃي ته دهشتگردي جي لاءِ ڪنهن به ملڪ جي خلاف افغان سرزمين ڪڏهن به استعمال نه ٿئي. هن چيو ته پاڪستان هڪ پرامن مستحڪم، خودمختيار، خوشحال وحدت واري افعانستان جي حمايت جاري رکندو جيڪو علائقائي امن، ترقي ۽ خوشحالي ۾ مستحڪم هجي. هن چيو ته اڄ اسان جي ايجنڊا ۾ معيشت، واپار ۽ ترقي جي اسان جي اجتماعي خواهش کي اڳيان وڌائڻ جي عملي قدمن تي غور ڪرڻ شامل آهي. آئو ايس سي او جي ڇٽي هيٺ جامع انداز ۾ علائقائي تعاون ۾ اضافي لاءِ اسان طرفان ڀرپور ڪوششون ڪرڻ جي عزم کي ورجايان ٿو، هن چيو ته اڄ حڪومتي سربراهن جي ڪائونسل ايس سي او جي بجيٽ ۽ 2022ع ۾ شروع ٿيندڙ دور جي لاءِ ٻن مستقل ادارن جي نئين اسٽاف اسٽرڪچر جي منظوري ڏيندي. پاڪستان سيڪريٽريٽ ۽ ايگزيڪيٽو ڪميٽي ۾ نائبن جو موجوده انگ 5 مان وڌائي 6 ڪرڻ جي تجويز جي حمايت ڪري ٿو، اسان 2022ع لاءِ تقريبن 10 سيڪڙو اضافي سان تجويز ڪيل بجيٽ جي به حمايت ڪريون ٿا، اسان کي يقيني آهي ته ايس سي او ميمبرن ملڪن ۾ گهڻ قومي واپار ۽ معاشي تعاون جي واڌ ويجهه ۽ اهم شعبن ۾ تعاون لاءِ موزون ماحول موجود آهي. هن چيو ته گهڻ رخن مسئلن کي اجتماعي انداز سان منهن ڏئي سگهجي ٿو، غربت جي خاتمي لاءِ قدمن بابت پاڪستان جو وڏو تجربو آهي، اسان پراعتماد آهيون ته پاڪستان جي تجويز ڪيل غربت جي خاتمي تي خصوصي ورڪنگ گروپ هن شعبي ۾ تجربن جي مٽاسٽا لاءِ هڪ مفيد پليٽ فارم ثابت ٿيندو جيڪو ايس سي او جي سڀني ميمبر ملڪن لاءِ نهايت اهميت جوڳو آهي. زرعي معيشت رکندڙ ملڪ طور پاڪستان غذائي پيداوار ۽ ان جي فراهمي تي ماحولياتي تبديلين جي اثرن کان چڱي ريت آگاهه آهي، وڌندڙ آبادين لاءِ غذائي تحفظ کي يقيني بڻائڻ اڄ عالمي چئلينج بڻجي ويو آهي. ان مسئلي جي جواب ۾ ايس سي او اڳواڻن دوشنبي جي سربراهي اجلاس ۾ غذائي تحفظ تي گڏيل بيان منظور ڪيو هو، اسان سمارٽ زراعت جي شعبي ۽ زرعي جدت پسندي کي متعارف ڪرائڻ لاءِ قدمن جي به آجيان ڪريون ٿا ۽ ايس سي او تحت خطي جي اندر غذائي تحفظ ۽ سماجي ۽ معآشي استحڪام کي برقرار رکڻ لاءِ زرعي ۽ صنعتي مصنوعات کي بنا رنڊڪ وهڪري کي يقيني بنائڻ جي قدمن جي حمايت ڪريون ٿا، هن چيو ته معيشت جي ترقي لاءِ نجي شعبو انجڻ جي حيثيت رکي ٿو. هن چيو ته ايس سي او بزنس ڪائونسل ۽ ايس سي او انٽربئنڪ ايسوسيئيشن واپاري ۽ معاشي شعبن ۾ تعاون جي فروغ جي اهم قدمن ۾ شامل آهن، هن چيو ته اسان انهن جي وچ ۾ رابطن ۾ اضافو ڏسڻ چاهيون ٿا، هن چيو ته گڏيل مقصد کي اڳيان وڌائڻ لاءِ وزيراعظم عمران خان علائقائي خوشحالي لاءِ ٽرانسپورٽ رابطن جي ڪانفرنس جو اعلان ڪيو آهي جيڪا 2022ع جي ٻي 6 ماهي ۾ منعقد ٿيندي، هن چيو ته اهڙي طرح هڪ ٻي نهايت اهم رخ جنهن تي پاڪستان ڌيان ڇڪرايو آهي اهو نوجوانن کي بااختيار بڻائڻ آهي ان ڏس ۾ 2022ع ۾ ڊجيٽل معيشت وسيلي نوجوانن کي بااختيار بڻائڻ جي ڪانفرنس منعقد ٿيندي جنهن جو وزيراعظم عمران خان دوشنبي ۾ علان ڪيو هو، جڏهن ته پاڪستان ٻين قدمن کي به اڳيان وڌائيندو جنهن ۾ ڪاروباري شخصيتن ۽ انٽر پرينيوئرز رابطن جي ايس سي او جي ڪم کي فروغ حاصل ٿيندو، 2022ع م ايس سي او خطي ۾ عورت پارليامينٽرين کي به گڏ ڪيو ويندو. آئون ايس سي او جي هدفن ۽ مقصدن تي اڳڀرائي جاري رکڻ جي پاڪستان جي پڪي عزم کي ورجائڻ سان گڏوگڏ پنهنجي ڳالهه ختم ڪندس ۽ اسان جو اهو عزم گهڻ قوميت تي اسان جي پختي يقين جي ڏڍ تي قائم آهي جيڪو مسئلن جي حل ۽ موقعن کي يقيني بڻائڻ جو سڀ کان موثر ذريعو آهي.
