اسلام آباد – 06 آگسٽ (اي پي پي) قومي اسيمبلي ۾ رحيم يار خان ڀُونگ شريف ۾ مندر ٽوڙڻ جي واقعي جي خلاف مذمتي قرارداد متفقه طور تي منظور ڪئي وئي. حڪومت پاران اها خاطري ڪرائي وئي ته پاڪستان ۾ اقليتن جي حقن ۽ انهن جي عبادتگاهن جو تحفظ يقيني بڻايو ويندو، پاڪستان جو آئين اقليتن جي تحفظ جي ضمانت ڏي ٿو، وزيراعظم عمران خان ان واقعي جو فوري نوٽيس وٺندي ان ۾ ملوث عنصرن جي فوري گرفتاري جا حڪم جاري ڪيا آهن، پاڪستان جي حڪومت ۽ عوام ان واقعي جي ڀرپور مذمت ڪئي آهي، پاڪستان جي قومي جهنڊي ۾ اڇو رنگ اقليتن جي حقن جي ضمانت ڏي ٿو. قومي اسيمبلي ۾ مسلم ليگ (ن) جي ميمبر ڪيسو مل چيو ته رحيم يار خان ۾ مندر جي ٽوڙ ڦوڙ قابل مذمت آهي، ان سان سڄي دنيا ۾ مسلمانن جي بدنامي ٿي آهي. جڏهن پوري قوم ڀارت طرف ڪشمير جي کنيل هڪطرفي قدمن جي مذمت ڪري رهي هئي اهڙي ۾ ان طرح جا واقعا افسوسناڪ آهن، تحريڪ انصاف جي ميمبر جئه پرڪاش چيو ته ڀونگ شريف ۾ گنيش مندر کي ساڙيو ويو ان جي مذمت ڪريون ٿا، ان واقعي جي فوري بعد اهو معاملو وزيراعظم جي نوٽيس ۾ آندو ويو، هن لاڳاپيل عملدارن کي هدايت ڪئي ته مندر جي سيڪيورٽي يقيني بڻائي وڃي، وزيراعظم ٽوئيٽ ڪيو، رات ان جي ايف آئي آر ڪٽي وئي، پوليس ان وقت خاموش تماشائي ڇو رهي، گهرو وزارت ان جو نوٽيس وٺي، اتان کان هندو برادري لڏپلاڻ ڪئي آهي ان کان اڳ ڪرڪ مندر جو واقعو ٿيو، اسان جي سمورن مندرن ۾ سيڪيورٽي فراهم ڪئي وڃي، سي سي ٽي وي ڪئميرا لڳايا وڃن، سمورن شرپسندن جون وڊيوز موجود آهن، انهن کي گرفتار ڇو نٿو ڪيو وڃي، مندر جي تعمير ۽ مرمت شروع ڪئي وئي آهي، اهڙن واقعن سان پاڪستان تي دنيا کلندي آهي، اهو معاملو گهرو وزارت جي ڪميٽي ڏانهن موڪليو وڃي، پيپلزپارٽي جي رميش لال چيو ته رحيم يار خان ۾ ٿيندڙ واقعو افسوسناڪ آهي، اتي رهندڙ هڪ سئو کان وڌيڪ هندوئن جو پاڻي بند ڪيو ويو ، پوءِ مندر جي حملو ڪيو ويو ان جو ذميدار ڊي پي او ۽ ڊي سي آهن، واقعي جي ٽن ڪلاڪن تائين پوليس نه آئي، ڪا به گرفتاري ناهي ٿي، لاڳاپيل عملدارن کي طلب ڪري انهن کان ان حوالي سان پڇيو وڃي، قومي اسيمبلي ميمبر شنيله رٿ چيو ته ان واقعي جي مذمت ڪريون ٿا، هندو برادري پرامن آهي، انهن سان اهڙو رويو مذمت جوڳو آهي، حڪومت هندو برادري سميت اقليتن سان گڏ بيٺل آهي، ڪجهه عنصر اهڙا آهن جيڪي اهڙي شرپسندي ڪندا آهن، پي ٽي آءِ جي ميمبر لالچند چيو ته اسلام اهڙن واقعن جي اجازت نٿو ڏي، اهڙن قدمن سان ملڪ بدنام ٿيندو آهي. وزيراعظم فوري ان جو نوٽيس ورتو، ان کانپوءِ ايف آءِ آر داخل ٿي وئي ان ۾ ملوث عنصرن کي سزا ڏني وڃي، سپريم ڪورٽ به ان جو نوٽيس ورتو آهي، اهڙا واقعا پاڪستان کي بدنام ڪرڻ جي سازش آهي، رميش لعل چيو ته اسان پهرين پاڪستاني پوءِ هندو آهيون، اسان کي برابري جا حق مليل آهن پر ڪجهه شرپسند اهڙن واقعن ۾ ملوث هوندا آهن، تحريڪ انصاف جي ميمبر رياض مزاري چيو ته اهو واقعو مذمت جوڳو آهي، اسلام جي نالي تي اها شدت پسندي ڪئي ويندي آهي، رميش ڪمار وانڪواڻي چيو ته اهو واقعو مذمت جوڳو آهي، ان حوالي سان قرارداد آڻي رهيا آهيون، ان واقعي جي فوري بعد وزيراعظم ايڪشن کنيو، سپريم ڪورٽ به نوٽيس ورتو، مولانا عبدالاڪبر چترالي واقعي جي مذمت ڪندي چيو ته پاڪستان ۾ ڪجهه عنصر وقت به وقت اسلام کي بدنام ڪرڻ جي لاءِ واقعا ڪندا آهن، حڪومت جي رٽ نه هجڻ سان اهڙا فساد ٿيندا آهن. اسلام امن جو دين آهي، اسان اقليتن جي عبادتگاهن جو به احترام ڪريون ٿا، جمعيت علماءُ اسلام (ف) جي ميمبر جمال الدين چيو ته جمعيت سدائين اهڙن واقعن جي مذمت ڪئي آهي، اسلام جي نالي تي ٺهندر ملڪ ۾ مسجدن کي به ڪيرايو ويندو آهي، ڏکڻ وزيرستان حالت جنگ ۾ آهي، پيپلزپارٽي جي ميمبر سيد نويد قمر چيو ته اهو واقعو مذمت جوڳو آهي، اهڙن واقعن جي روڪٿام لاءِ گڏجي ڪو لائحه عمل جوڙيو وڃي، اهائي اسلام جي تعليم ۽ قائداعظم جا فرمان آهن. هتي رهندڙن کي برابري جا حق حاصل آهن، انهن جا مذهبي ماڳ مقدس آهن، هر پاڪستاني کي بنا خوف ۽ خطري پنهنجي مذهب موجب عبادت جو حق حاصل آهي. اها انتظاميه جي به ناڪامي آهي، مسلم ليگ (ن) جي ميمبر مهناز اڪبر عزيز چيو ته اهو واقعو قابل مذمت آهي، پاڪستان جيترو مسلمانن جو آهي ايترو ئي اقليتن جو به آهي، انهن کي به پنهنجي مذهبي آزادي سان عبادت جو حق حاصل آهي، اسان جي قومي جهنڊي ۾ اڇو رنگ اقليتن جو آهي، ايم ڪيو ايم جي ميمبر ڪشوره زهره چيو ته ايم ڪيو ايم قائداعظم جي پاڪستان تي يقين رکي ٿي، اسان ان واقعي جي ڀرپور مذمت ڪريون ٿا. صلاح الدين چيو ته ان افسوسناڪ واقعي جي جيتري مذمت ڪئي وڃي اها گهٽ آهي، اسان ان کي دهشتگردي سمجهون ٿا، اهڙن واقعن کي مدرسن سان جوڙڻ قابل مذمت آهي، مرتضيٰ جاويد عباسي چيو ته اهو واقعو مذمت جوڳو آهي ان تي حڪومت رپورٽ پيش ڪري، محسن داوڙ چيو ته رحيم يار جو واقعو مذمت جوڳو آهي، اها دهشتگردي آهي، وفاقي وزير ڊاڪٽر شيرين مزاري چيو ته ان واقعي جو وزيراعظم نوٽيس ورتو، آءِ جي حڪم ڏنا ته ان ۾ ملوث عنصرن کي گرفتار ڪري، پوليس جي سستي تي ڪارروائي جي هدايت ڪئي، انساني حقن واري وزارت به رحيم يار خان انتظاميه سان رابطي ۾ آهي، وزيراعظم ان مندر جي مرمت جا حڪم ڏنا، ان معاملي تي سياست نه ڪئي وڃي، صوبائي حڪومت به ان تي ڪارروائي ڪري رهي آهي، ڊپٽي اسپيڪر چيو ته پاڪستان جو آئين سمورن مذهبن جي پاڪستانين کي برابر حق ڏي ٿو، عبادت گاهن جو تحفظ آئين ڏي ٿو، اسان سڀ پهرين پاڪستاني آهيون، مملڪتي وزير علي محمد خان چيو ته دين ۾ ڪا به زبردستي نه آهي، مسلمان جيڪڏهن غير مسلمانن جا حق ڦٻائيندو ته نبي ڪريم ﷺ قيامت جي ڏينهن ان تي پاڻ پڇڻ جي ڳالهه ڪئي آهي، ڪنهن کي اهو حق نه آهي ته هو ڪنهن جي عبادت گاهن کي نقصان پهچائي. جيڪو به واقعي ۾ ملوث آهن اهي انسان ئي نه آهن، حڪومت پاران عالمن ان جي مذمت ڪئي آهي، اقليتن کي اهو يقين ڏياريون ٿا ته ان معاملي تي اسان سڀ هڪ آهيون، ڪشمير ۾ جيڪو ٿي رهيو آهي ان تي سمورا پاڪستاني گذريل ڏينهن ڪشميرين سان گڏ بيٺا. حڪومت پاران مخالف ڌر پاران ان واقعي جي مذمت ڪريون ٿا، اسان هندو برادري سان همدردي ڪريون ٿا، حڪومت سدائين اهڙن واقعن جي مذمت ڪئي آهي، اسان جو قومي جهنڊو اقليتن جي تحفظ جي ضمانت ڏي ٿو، اسان جون عدالتون، مدرسا اهڙن واقعن جي خلاف بيهندا آهن جڏهن ته اسان جي پاڙيسري ملڪ ڀارت ۾ ان جي ابتڙ عدالتون بابري مسجد جهڙي سانحي ۾ انصاف ناهن ڏينديون اتي اقليتن کي نشانو بڻايو ويندو آهي، ان موقعي تي هن قرارداد پيش ڪئي ته هي ايوان ڀونگ شريف رحيم يار خان ۾ مندر کي ٽوڙڻ ۽ سخت نقصان پهچائڻ جي واقعي جي سخت مذمت ڪري ٿو ۽ ان ڏک ۾ پنهنجي هندو برادري سان گڏ بيٺل آهي، وزيراعظم عمران خان به ان جي سخت مذمت ڪئي ۽ ان ۾ ملوث عنصرن کي ڪيفر ڪردار تائين پهچائڻ جي هدايت ڪئي، قراداد ۾ چيو ويو ته هي ايوان ان عزم جو اظهار ڪري ٿو ته پاڪستان ۾ اقليتن جي حقن ۽ عبادتگاهن جو تحفظ يقيني بڻايو ويندو، ان مسئلي تي پوري حڪومت ۽ قوم هڪ آهي، اسلام اقليتن جي حقن جو مڪمل تحفظ ڪري ٿو، هي ايوان اقليتن کي انهن جي حقن جي مڪمل تحفظ جي خاطري ڪرائي ٿو.
