اسلام آباد – 29 آڪٽوبر (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته سعودي عرب جي لاءِ شريف خاندان جي ڪا اهميت ناهي رهي، احتساب جو عمل منطقي انجام تائين پهچايو ويندو، سعودي پئڪيج کانپوءِ وڌيڪ ٻه وڏا پئڪيجز اچي رهيا آهن، ڪنهن بيوروڪريٽ کي چونڊيل نمائندي جو فون نه ٻڌڻ جو اختيار نه آهي، مخالف ڌر وٽ نه ڪو نظريو آهي نه ئي ڪا ليڊرشپ، مخالف ڌر جو هڪ ئي مقصد آهي ته انهن جي خلاف ڪيس روڪيا وڃن، مخالف ڌر جي سموري حڪمت عملي اين آر او وٺڻ جي لاءِ آهي. هڪ نجي ٽي وي چينل جي پروگرام ۾ ڳالهائيندي هن چيو ته مخالف ڌر پاران اي پي سي گهرائڻ ۽ انهن جا ٻيا معاملا ان ڳالهه طرف اشارو ڪن ٿا ته هي ماڻهو اين آر او وٺڻ لاءِ ئي ڪوششون ڪري رهيا آهن.
