اسلام آباد – 14 سيپٽمبر (اي پي پي) پاڪستان ۽ ترڪي واپاري اقتصادي سيڙپڪاري ۽ دفاعي لاڳاپن کي وڌيڪ وڌائڻ سميت آزاداڻي واپار معاهدي (ايف ٽي اي) کي جلد کان جلد عملي جامو پارائڻ تي اتفاق ڪيو آهي، اهڙو اتفاق راءِ ڪالهه جمعي ڏينهن پرڏيهي وزارت ۾ ٻنهي ملڪن جي وچ ۾ وفدن جي سطح تي ڳالهين دوران ڪيو ويو جنهن ۾ پاڪستان جي پرڏيهي وزير شاهه محمود قريشي پاڪستاني وفد جڏهن ته ان جي ترڪ هم منصب ميولٽ شاوس اوولو ترڪ وفد جي قيادت ڪئي. پرڏيهي کاتي جي ترجمان موجب پاڪستان جي پرڏيهي وزير شاهه محمود قريشي پنهنجي آجياڻي وارن لفظن ۾ پاڪستان ۽ ترڪي کي ڀائر دوست ۽ پارٽنر قرار ڏيندي چيو ته ٻئي ملڪ گڏيل اعتماد جي بنياد تي گڏيل عقيدي، تاريخ ۽ ثقافت جي جدا نه ٿيندڙ رشتن ۾ ڳنڍيل آهن جڏهن ته ترڪي جي پرڏيهي وزير پنهنجي پاڪستاني هم منصب کي ترڪ صدر رجب طيب اردوان ۽ ترڪ عوام پاران نيڪ تمنائن جو پيغام پهچايو ۽ کيس پنهنجا فرض سنڀالڻ تي مبارڪباد ڏني.
