اسلام آباد – 25 جنوري (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته مريم نواز تي ڪوڙا الزام هڻڻ کان بهتر آهي ته عمران خان ايندڙ سال ٿيندڙ عام چونڊن جي تياري ڪري. سپريم ڪورٽ ٻاهران صحافين سان ڳالهائيندي هن چيو ته عمران خان پاناما ليڪس جي حوالي سان مريم نواز تي ڪوڙا الزام هڻڻ بدران 2018ع جي چونڊن جي تياري ڪري ڇو ته کيس انهن چونڊن ۾ مريم نواز جو مقابلو ڪرڻو آهي. هن چيو ته اڄ عدالت ۾ واضح طور تي اهو چيو ويو ته جن دستاويزن بابت انڪشاف ٿيڻ جي دعويٰ ڪئي پئي وڃي، عدالت وٽ اڳ ۾ ئي موجود آهن. حقيقت ۾ تحريڪ انصاف اهو ڊرامو ڪري ٿي ته انهن دستاويزن سان ڪو وڏو انڪشاف ٿيڻ وارو آهي، اصل ۾ انهن جو مقصد پاناما ليڪس تي سياست ڪرڻ آهي.
