اسلام آباد – 10 آڪٽوبر (اي پي پي) پارلياماني معاملن جي وفاقي وزير شيخ آفتاب احمد چيو آهي ته پاڪستان مسلم ليگ (ن) جي سينٽرل ايگزيڪيوٽو ڪميٽي جي اجلاس ۾ ٻين سياسي معاملن تي ڳالهين کانسواءِ ڀارت کي پڻ واضح پيغام ڏنو ويو آهي ته پاڪستان امن جو خواهشمند آهي ۽ جيڪڏهن جنگ مڙهڻ جي ڪوشش ڪئي وئي ته منهن ٽوڙ جواب ڏنو ويندو. اهڙن خيالن جو اظهار هن وزيراعظم محمد نواز شريف جي صدارت ۾ مسلم ليگ (ن) جي سينٽرل ايگزيڪيوٽو ڪميٽي جي اجلاس کانپوءِ اي پي پي سان ڳالهائيندي ڪيو. شيخ آفتاب احمد چيو ته ايگزيڪيوٽو ڪميٽي جي ميمبرن ڪشمير مسئلي کي عالمي فورم تي اٿارڻ ۽ ڪشميري عوام جي حمايت جاري رکڻ جي لاءِ موثر پاليسين تي وزيراعظم محمد نواز شريف جي ڪوششن کي ساراهيو ۽ ايندڙ حڪمت عملي تي پڻ وزيراعظم پنهنجي خطاب ۾ ڳالهه ڪئي.
