اسلام آباد-30 آگسٽ (اي پي پي)سامونڊي معاملن واري وفاقي وزير محمد جنيد انوار چوڌري چيو آهي ته پاڪستان طرفان آمريڪا کي مڇي ۽ مڇي سان لاڳاپيل شين جي روانگي واپار ۾ وڌيڪ چئن سالن جي واڌ جو اختيار ملي ويو آهي. سامونڊي معاملن واري وزارت موجب پنهنجي بيان ۾ وفاقي وزير چيو ته هي فيصلو پاڪستان جي سامونڊي غذا جي معيار جي عالمي سڃاڻپ جي عڪاسي ڪري ٿو ۽ شعبي کي ڊگهي مدي جو استحڪام فراهم ڪندو، اميد آهي ته ان واڌ سان سامونڊي غذا جي عالمي مارڪيٽ ۾ اسان جي پوزيشن کي هٿي ملندي جنهن سان دنيا جي سڀ کان وڏي سامونڊي غذا جي درآمد ڪندڙن تائين رسائي حاصل ٿيندي. هن وضاحت ڪئي ته آمريڪا جي نيشنل اوشينڪ اينڊ ايٽمو سفيرڪ ايڊمنسٽريشن ميرين ميمل پروٽيڪشن ايڪٽ تحت پرڏيهي ماهيگيري جي فهرست ۾ شامل سمورن پاڪستاني ماهي گيرن جي مقابلي طور درجابندي ڪئي آهي. جنيد انوار چوڌري چيو ته هي درجابندي ان ڳالهه جي تصديق ڪري ٿي ته پاڪستان جي ماهيگيري جي صنعت سامونڊي جانورن کي ماهيگيري دوران حادثاتي موتن ۽ شديد زخمن کان بچائڻ لاءِ آمريڪي معيار تي پورو لهي ٿي، هن چيو ته هن وقت پاڪستاني سامونڊي غذا عالمي مارڪيٽ ۾ اٽڪل 2 آمريڪي ڊالر في ڪلوگرام ڪمائي ٿي، تعميل جي هن عالمي واڌ سان قيمت ۾ واڌ جو امڪان آهي ۽ پاڪستاني روانگي واپار ڪندڙن لاءِ يورپ ۽ نار ۾ ڪيتريون ئي نيون منڊيون کلنديون، هن چيو ته گذريل مالي سال 25-2024ع ۾ پاڪستان 242484 ميٽرڪ ٽن مڇي ۽ ان سان لاڳاپيل شين جي روانگي واپار سان 489.2 ملين ڊالرز ڪمايا ۽ سراسري ۽ 2 آمريڪي ڊالر في ڪلوگرام جي حساب سان روانگي واپار ڪيو. جڏهن ته هلندڙ مالي سال ۾ قومي روانگي واپار جو ڳاڻيٽو اٽڪل 600 ملين ڊالر تائين وڌڻ جي اميد آهي، هن ان ڳالهه تي زور ڀريو ته اها منظوري آمريڪي مارڪيٽ ۾ پاڪستان جي ڪروڙين ڊالرن جي سامونڊي خوراڪ جي روانگي واپار جي تحفظ لاءِ تمام ضروري آهي ان سان گڏوگڏ سڄي دنيا ۾ ذميواراڻي ۽ پائيدار ماهيگيري جي انتظام لاءِ ملڪ جي ساک ۾ به واڌ ڪري ٿي. هن سامونڊي جانورن جي آبادي لاءِ حفاظتي قدمن کي مسلسل مضبوط ڪرڻ جي اهميت تي به زور ڀريو ۽ چيو ته سامونڊي حياتيات جي مختلف قسمن جي ڊگهي مدي واري صحت کي يقيني بڻايو ويندو.
