اسلام آباد – 29 آگسٽ (اي پي پي) ائٽمي تحقيق بابت يورپي تنظيم (سرن) جي اعليٰ سطحي وفد 24 کان 28 آگسٽ تائين پاڪستان جو دورو ڪيو ۽ سائنس ۽ ٽيڪنالاجي جي شعبي ۾ پاڪستان جي ترقي جي اڳڀرائي جو جائزو ورتو. پرڏيهي آفيس پاران جاري بيان موجب دوري دوران سرن جي پنج ماهرن تي ٻڌل ٽيم پاڪستان ائٽمي توانائي ڪميشن جي چيئرمين سان ملاقات ڪئي ۽ ڪيترن ئي سائنسي ۽ تحقيقي ادارن جو معائنو ڪيو. انهن ادارن ۾ نيشنل سينٽر فار فزڪس، هيوي مڪينيڪل ڪمپليڪس – 3، پاڪستان انسٽيٽيوٽ آف انجنيئرنگ اينڊ اپلائيڊ سائنسز، پاڪستان انسٽيٽيوٽ آف نيوڪليئر سائنس اينڊ ٽيڪنالاجي، انسٽيٽيوٽ آف نيوڪليئر ميڊيسن اينڊ آنڪولوجي، نيشنل انسٽيٽيوٽ فار ليزر اينڊ آپٽرونڪس ۽ ٻيا جديد تحقيقي مرڪز شامل هئا. انهن دورن جو مقصد پاڪستان جي سائنس ۽ ٽيڪنالاجي جي شعبي ۾ حاصل ٿيندر ڪاميابين جو جائزو وٺڻ هو. سرن جيڪا يورپ جي جوهري تحقيق جي تنظيم آهي اُهو دنيا جو مشهُور ۽ پارٽيڪل فزڪس ۽ جوهري تحقيق جو وڏو ادارو آهي. جيڪو جنيوا ۾ يورپي ملڪن امن بابت سائنس جي اصول تي قائم ڪيو. اڄ سرن هڪ عالمي مرڪز جي حيثيت رکي ٿو جنهن جا 25 ميمبر ملڪ ۽ 9 ايسوسيئيٽ ميمبرز آهن جن ۾ پاڪستان به شامل آهي. پاڪستان 31 جولاءِ 2015ع تي سرن جو ايسوسيئيٽ ميمبر بڻيو ۽ تڏهن کان مختلف منصوبن ۾ سرگرم عمل آهي. پاڪستان اٽامڪ انرجي ڪميشن سرن سان پاڪستان جي تعاون کي ٺوس بڻائڻ جي لاءِ سرگرم ڪردار ادا ڪري رهيو آهي، پاڪستان ميمبرشپ جي ذريعي نمايان فائدا حاصل ڪيا آهن جن ۾ جديد سائنسي تحقيق تائين پهچ، ٽيڪنالاجي جي ترقي ۽ سائنسدانن ۽ انجنيئرن جي نئين نسل جي تربيت شامل آهي.
