اسلام آباد-28 آگسٽ (اي پي پي) پاڪستان ٽوئر ازم ڊولپمينٽ ڪارپوريشن (پي ٽي ڊي سي)، سلڪ روڊ سينٽر، آءِ ڊاٽ ڪول ۽ گرين ٽوئر ازم جي سهڪار سان گنڌارا ڪلچر اينڊ ٽوئر ازم فيسٽيول جي تيارين جي سلسلي ۾ ”گنڌارا انٽر فيٿ ڊائلاگ“ جو بندوبست ڪيو ويو. شرڪت ڪندڙن باباءِ قوم جي پاڪستان جي تصور کي ورجايئندي چيو ته پاڪستان ڪنهن به قسم جي فرق کانسواءِ سمورن شهرين لاءِ برابريءَ جا حق رکندڙ ملڪ آهي. گنڌارا انٽر فيٿ ڊائلاگ جي تقريب علامه اقبال اوپن يونيورسٽيءَ ۾ منعقد ٿي، جنهن جو خاص مهمان مذهبي معاملن وارو سيڪريٽري ڊاڪٽر سيد عطاءُ الرحمان هو. هن پنهنجي خطاب ۾ چيو ته قائداعظم جو ويزن هڪ اهڙو پاڪستان هو جتي سڀني مذهبن کي مڃيندڙن کي برابريءَ وارا حق حاصل هجن، اڄ جي هي تقريب اسان جي آئيني اصولن برداشت، شموليت ۽ گڏيل احترام جي ڀرپور عڪاس آهي. ان موقعي تي ٻُڌايو ويو ته هيءَ تقريب هلندڙ سال نومبر ۾ ٿيندڙ گنڌارا ڪلچر اينڊ ٽوئر ازم فيسٽيول جي تيارين جو حصو هئي جنهن جو مقصد پاڪستان جي مختلف مذهبي برادرين جي خدمتن کي خراجِ تحسين پيش ڪرڻ ۽ قومي يڪجهتي ۽ خوشحاليءَ ۾ ان جي ڪردار کي اجاگر ڪرڻ هو. تقريب ۾ مسلم، عيسائي، هندو، سک، ٻڌمت ۽ بهائي برادرين جي مذهبي اڳواڻن ۽ ناليوارين شخصيتن شرڪت ڪئي. مقررن قائداعظم محمدعلي جناح جي پاڪستان جي تصور کي ورجائيندي چيو ته پاڪستان سڀني شهرين لاءِ برابر وارا حق رکندڙ ملڪ آهي، توڙي جو ان جو تعلق ڪنهن به مذهب سان هجي.
پي ٽي ڊي سي جي ايم ڊي آفتاب الرحمان رانا آجياڻي واري خطاب ۾ گنڌارا تهذيب جي ثقافتي ۽ روحاني اهميت تي روشني وڌي. هن چيو ته گنڌارا جي عظيم ورثي کي اجاگر ڪرڻ ۽ بين المذاهب هم آهنگيءَ کي هٿي ڏيڻ پي ٽي ڊي سي جي پهرين ترجيحن ۾ شامل آهي. گنڌارا ڪلچر اينڊ ٽوئر ازم فيسٽيول ان سلسلي جي هڪ اهم ڪڙي آهي. پنجاب آرڪيالوجي ڊپارٽمينٽ جي ڊپٽي ڊائريڪٽر ۽ ناليواري محقق انجم دارا پنهنجي مُک خطاب ۾ گنڌارا تهذيب جي تاريخي جدت ۽ ٻڌمت جي شروعات تي روشني وڌي. هن گنڌارا جي تاريخي پسِ منظر ۾ مذهبي هم آهنگي جا مثال پيش ڪيا. ”هڪ خوشحال ۽ جامع پاڪستان ۾ مذهب جو ڪردار“ جي موضوع تي پينل ڊسڪشن منعقد ٿي، جنهن جو انتظام سلڪ روڊ سينٽر واري اداري جي ڊائريڪٽر ڊاڪٽر اجلال حسين ڪئي. مختلف مذهبن جي نمائندن پُرامن، گڏيل بقا ۽ قومي ترقيءَ ۾ گڏيل تعاون جي اهميت تي زور ڀريو. گرين ٽوئر ازم جي خيرسگالي واري سفير عمران شوڪت مذهبي سياحت کي هٿي وٺرائڻ ۾ امن ۽ رواداري جي ضرورتن تي زور ڀريو ۽ پاڪستان جي مثبت سُڃاڻپ کي اجاگر ڪرڻ لاءِ گڏيل ڪوششون جي اپيل ڪئي. ڪرسچين اڳواڻ البرٽ ڊيوڊ چيو ته پُرامن، گڏيل بقا، گڏيل احترام ۽ شموليت ئي اهو رستو آهي جيڪو اسان جي ايندڙ نسلن لاءِ هڪ خوشحال مستقبل جي ضمانت ڏئي سگهي ٿو. پاڪستان هندو ڪائونسل جي نمائندي روهت ڪمار چيو ته اهڙيون تقريبون اسان جي گڏيل وابستگيءَ کي اجاگر ڪن ٿيون جيڪي هم آهنگي، برداشت ۽ شموليت تي ٻَڌل آهن. سردار اندر جيت سنگهه، بابا گرو نانڪ جي قولن جو حوالو ڏيندي چيو ته اسان سڀ پهريان انسان آهيون، ان کانپوءِ ڪا مذهبي سُڃاڻپ اچي ٿي، انسانيت هميشه مقدم آهي. بهائي برادريءَ جي نمائندي شگوفه جمال چيو ته بهائي برادري پاڪستان ۾ اتحاد ۽ جدت جي حسن تي يقين رکي ٿي ۽ هڪ جامع، پُرامن معاشري جي قيام لاءِ سڀني مذهبن سان گڏجي ڪم ڪري ٿي. ٻڌمت ڪميونٽي جي نمائندي راميش نائيڪ گنڌارا جي تاريخي وراثت کي ساراهيو ۽ سنڌ ۾ پنهنجي ڪميونٽي جي خدمتن جو ذڪر ڪيو. آخر ۾ آءِ ڊاٽ ڪول جي سي اي او محمد حسن سڀني شرڪت ڪندڙن جو ٿورو مڃيو ۽ چيو ته هي ڊائلاگ نومبر ۾ ٿيندڙ گنڌارا ڪلچر اينڊ ٽوئر ازم فيسٽيول جي تيارين جو سلسلو آهي. هن سڀني شهرين کي فيسٽيول ۾ ڀرپور شرڪت جي دعوت ڏني.
