اسلام آباد – 28 آگسٽ (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار سان خيبرپخونخواهه اسيمبلي جي مخالف ڌر اڳواڻ ڊاڪٽر عباد الله خان ملاقات ڪئي. پرڏيهي آفيس پاران جاري بيان موجب ملاقات ۾ تازي تباهي آڻيندڙ برساتن ۽ ٻوڏ سبب پيدا ٿيندڙ سنگين صورتحال تي تفصيلي خيالن جي ڏي وٺ ڪئي وئي جنهن سڄي صوبي جي مقامي آبادين ۽ خاندانن کي شديد متاثر ڪيو آهي. نائب وزيراعظم ۽ پرڏيهي وزير صورتحال تي گهري ڳڻتي جو اظهار ڪندي متاثر خاندانن سان يڪجهتي جو اظهار ۽ يقين ڏياريو ته وفاقي حڪومت ريليف ۽ بحالي جي ڪوششن ۾ ڀرپور تعاون فراهم ڪندي. ان موقعي تي ٻنهي اڳواڻن ٻين سياسي معاملن تي پڻ خيالن جي ڏي وٺ ڪئي.
