اسلام آباد-28 آگسٽ (اي پي پي) قومي غذائي تحفظ ۽ تحقيق واري وفاقي وزير رانا تنوير حسين آبادگارن جي مفادن جي تحفظ ۽ ڪڻڪ جي مارڪيٽ جي استحڪام ذريعي غذائي تحفظ کي پاڻڀرو ڪرڻ جي يقيني عزم جو اظهار ڪيو آهي. وفاقي وزير جي صدارت هيٺ هتي ويٽ بورڊ جو 8هون اجلاس منعقد ٿيو. اجلاس ۾ ملڪ ۾ ڪڻڪ جي طلب ۽ رسد جي صورتحال ۽ ربيع سيزن 26-2025ع لاءِ اهم زرعي جنسن جي دستيابيءَ جو تفصيلي جائزو ورتو ويو. وزارت موجب اجلاس کي خطاب ڪندي وفاقي وزير چيو ته ملڪ ۾ ڪڻڪ جي دستيابي 33.47 ملين ميٽرڪ ٽن آهي، جڏهن ته قومي ضرورت 33.58 ملين ميٽرڪ ٽن آهي. اهڙيءَ طرح صرف 0.11 ملين ميٽرڪ ٽن جو معمولي فرق سامهون اچي ٿو. هن واضح ڪيو ته اها گهٽتائي معمولي آهي ۽ ملڪ ۾ ڪڻڪ جي ذخيرن جي حوالي سان ڪنهن قسم جي ڳڻتي جي ضرورت ناهي. وفاقي وزير چٽو اعلان ڪيو ته موجوده حالتن ۾ پاڪستان ڪڻڪ امپورٽ نه ڪندو ڇاڪاڻ ته موجوده ذخيرا ملڪي ضرورتن کي پورو ڪرڻ لاءِ ڪافي آهي. هن چيو ته حڪومت جي پهرين ترجيح مقامي آبادگارن جي مفادن جو تحفظ آهي، نه ئي مارڪيٽن يا واپارين جو. هن ان ڳالهه تي زور ڀريو ته يوريا ۽ ٻين زرعي جنسن جي وافر فراهمي ايندڙ ربيع سيزن لاءِ يقيني بڻائي وئي آهي ته جيئن آبادگارن کي فصل پوکڻ ۾ ڪنهن قسم جي ڏُکيائي پيش نه اچي. هن اطمينان ڪرايو ته عالمي سطح تي ڀاڻن جي قيمتن ۾ واڌ باوجود حڪومت ملڪ ۾ ڀاڻن جي قيمتن کي سختيءَ سان ڪنٽرول ۾ رکيو آهي ته جيئن پيداوار جي لاڳت آبادگارن جي ڪنٽرول ۾ رهي. رانا تنوير حسين خبردار ڪيو ته صوبائي سطح تي ڪنهن به قسم جي سختي ۽ غير ضروري پاليسي سازي، خاص ڪري پنجاب ۾، مارڪيٽ ۾ خوف ۽ هراس ڦهلائڻ ۽ صورتحال کي خراب ڪرڻ جو سبب بڻجي سگهي ٿي. هن چيو ته 18هين آئيني ترميم کانپوءِ اختيار صوبن کي منتقل ٿي ويا آهن، جنهن سبب ڪجهه وقتن ۾ قومي سطح تي زرعي پاليسيون لاڳو ڪرڻ ۾ رڪاوٽون پيش اچن ٿيون. هن وفاقي ۽ صوبائي حڪومتن وچ ۾ بهتر هم آهنگي تي زور ڀريو ته جيئن پاليسين کي مؤثر طريقي سان لاڳو ڪري سگهجي. وفاقي وزير وڌيڪ چيو ته ملڪ ۾ پائيدار غذائي تحفظ لاءِ ضروري آهي ته في ايڪڙ ڪڻڪ جي پيداوار ۾ واڌ ڪئي وڃي ۽ پوکيءَ جي لاڳت گهٽ ڪئي وڃي، جنهن لاءِ جديد ٽيڪنالاجي، جنسن جو مؤثر استعمال ۽ آبادگارن جي معاونت اڻٽر آهي. هن چيو ته اسان کي وقتي قدمن بدران پائيدار حل ڏانهن ڌيان ڏيڻو پوندو ته جيئن آبادگارن کي بااختيار بڻائي ڪڻڪ جي پيداوار ۾ پاڻڀرا ٿي سگهون. اجلاس جي پڄاڻيءَ تي ان عزم کي ورجايو ته قومي غذائي تحفظ ۽ تحقيق واري وزارت صوبن سان ويجهي تعاون ذريعي آبادگارن جي مفادن جي تحفظ ۽ عوام کي ڪڻڪ جي بنا رڪاوٽ فراهميءَ کي يقيني بڻائيندي.