اسلام آباد – 27 آگسٽ (اي پي پي) وزيراعظم محمد شهباز شريف هنرمند پاڪستاني افرادي قوت کي بيلاروس ۾ نوڪرين جي فراهمي جي لاءِ ٻنهي ملڪن جي وچ ۾ مفاهمتي يادداشت تي صحيحن جي آجيان ڪندي چيو آهي ته پاڪستان ۽ بيلاروس جي وچ ۾ دوستاڻا لاڳاپا وقت سان گڏ وڌيڪ مستحڪم ٿي رهيا آهن. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف سان بيلاروس جي گهرو وزير ايون ڪبراڪو جي سربراهي ۾ وفد ملاقات ڪئي. وزيراعظم بيلاروس جي گهرو وزير جي پاڪستان اچڻ تي آجيان ڪندي چيو ته پاڪستان ۽ بيلاروس جي وچ ۾ دوستاڻا لاڳاپا آهن، جيڪي وقت سان گڏ وڌيڪ مضبوط ٿي رهيا آهن. هن هلندڙ سال پنهنجي بيلاروس جي دوري جو ذڪر ڪندي بيلاروس جي صدر اليگزينڊر لوڪا شينڪو جي لاءِ پنهنجي نيڪ خواهشن جو اظهار ڪيو. هن چيو ته سندس بيلاروس جي دوري دوران پاڪستان ۽ بيلاروس جي وچ ۾ مختلف شعبن ۾ تعاون جي ڪيترن ئي معاهدن ۽ مفاهمتي يادداشتن تي صحيحون ٿيون. هن چيو ته مون کي خوشي آهي ته منهنجي بيلاروس جي دوري دوران پاڪستان مان هنرمند ماڻهن کي بيلاروس ۾ مختلف شعبن ۾ نوڪرين جا موقعا فراهم ڪرڻ جي حوالي سان ٻنهي ملڪن ۾ جيڪو اتفاق ٿيو هو، اڄ ان حوالي سان ٻنهي ملڪن مفاهمتي يادداشت تي صحيحون ڪيون آهن. وزيراعظم چيو ته اسان بيلاروس جي صدر جي پاڪستان جي دوري جا منتظر آهيون. بيلاروس جي گهرو وزير پاڪستان ۾ شاندار استقبال ۽ ميزباني تي وزيراعظم جا ٿورا مڃيا. هن وزيراعظم کي بيلاروس جي صدر پاران نيڪ خواهشن جو پيغام پهچايو. هن پاڪستان سان زراعت ۽ صنعت سميت مختلف شعبن ۾ تعاون وڌائڻ ۽ گڏجي ڪم ڪرڻ جي خواهش جو اظهار ڪيو. هن دوري دوران وفاقي گهرو وزير محسن نقوي ۽ سمنڊ پار پاڪستانين ۽ انساني وسيلن واري وفاقي وزير چوڌري سالڪ حسين سان پنهنجي ملاقاتن جو ذڪر ڪندي چيو ته اهي ملاقاتون ٻنهي ملڪن جي وچ ۾ لاڳاپن کي اڳتي وڌائڻ جي حوالي سان انتهائي ڪارائتيون رهيون. وفاقي گهرو وزير محسن نقوي وزيراعظم کي آگاهه ڪيو ته بيلاروس جي گهرو وزير وفد سان گڏ نيشنل ڊيٽا بيس رجسٽريشن اٿارٽي جو دورو پڻ ڪيو. سمنڊ پار پاڪستانين ۽ انساني ترقي ۽ وسيلن واري وزير چوڌري سالڪ ٻڌايو ته هنرمند پاڪستانين کي بيلاروس موڪلڻ جي حوالي سان ٻنهي ملڪن جي وچ ۾ مفاهمتي يادداشت تي صحيحون ٿيون آهن جنهن کانپوءِ هنرمند پاڪستانين کي بيلاروس موڪلڻ جو عمل باقاعده شروع ٿي ويندو. بيلاروس پاڪستاني هنرمند افرادي قوت کي ميڊيڪل سميت سماجي تحفظ جون ٻيون سهولتون پڻ فراهم ڪندو. ملاقات جي موقعي تي وفاقي گهرو وزير محسن نقوي، سمنڊ پار پاڪستانين ۽ انساني ترقي ۽ وسيلن وارو وفاقي وزير چوڌري سالڪ حسين، گهرو معاملن وارو مملڪتي وزير طلال چوڌري، سمنڊ پار پاڪستانين ۽ انساني ترقي ۽ وسيلن وارو مملڪتي وزير محمد عون چوڌري ۽ اعليٰ سرڪاري آفيسر پڻ موجود هئا.
