اسلام آباد- 27 آگسٽ (اي پي پي) صدر آصف علي زرداري ڪائونسل آف پاڪستان نيوز پيپر ايديٽرز (سي پي اين اي) جي اڳوڻي سيڪريٽري جنرل عامر محمود جي لاڏاڻي تي گهري ڏک ۽ افسوس جو اظهار ڪيو آهي. ايوان صدر جي پريس ونگ پاران جاري تعزيتي بيان ۾ صدر مرحوم جي گهرڀاتين سان دلي همدرديءَ ۽ تعزيت جو اظهار ڪيو. صدر چيو ته عامر محمود صحافت ۽ اشاعتي دنيا جو معتبر ۽ روشن نالو هو، مرحوم پنهنجي پيشيواراڻي خدمتن سان صحافت ۽ ادب ۾ نمايان ڪردار ادا ڪيو. صدر آصف علي زرداري چيو ته مرحوم جي اڻٿڪ صحافتي خدمتن کي سدائين ياد رکيو ويندو. صدر آصف علي زرداري دعا ڪئي ته الله تعاليٰ مرحوم کي جنت الفردوس ۾ اعليٰ مقام ۽ پونئيرن کي صبر جميل عطا فرمائي.
