واشنگٽن – 27 آگسٽ (اي پي پي) آمريڪي صدر ڊونلڊ ٽرمپ چيو آهي ته جيڪڏهن روس يوڪرين ۾ ساڍن ٽن سالن کان جاري تڪرار ۾ جنگ بندي کي رد ڪري ٿو ته ان خلاف انتهائي سخت اقتصادي پابنديون لاڳو ڪيون وينديون. پرڏيهي ميڊيا مطابق ڊونلڊ ٽرمپ ميڊيا سان ڳالهائيندي روس جي جنگ بندي تي اتفاق نه ڪرڻ جي حوالي سان ساول جي جواب ۾ چيو ته اهو تمام سنجيده معاملو آهي جيڪو منهنجي ذهن ۾ آهي، جيڪڏهن مونکي ڪرڻو پيو، پر مان چاهيان ٿو ته اهو ختم ٿئي. اسان وٽ اقتصادي پابنديون آهن، ۽ مان معيشت جي حوالي سان ڳالهايان پيو ڇو جو اسان ڪنهن عالمي جنگ ۾ نٿا پوڻ چاهيون. آمريڪي صدر ان عزم جو اظهار ڪيو ته هو روسي صدر ولاديمير پيوٽن ۽ يوڪريني صدر ولاديمير زيلنسڪي وچ ۾ سڌي ريت ملاقات جي ڪوشش ڪري رهيو آهي، پر روسي اختيارين چيو آهي ته ان لاءِ حالتون اڃان مناسب ناهن. جڏهن ته ٻئي طرف آمريڪا جي خصوصي نمائندي اسٽيووٽڪوف چيو آهي ته منھنجي راءِ ۾ امڪاني طور ھڪ طرفي ملاقات ٿيندي، ان معاھدي لاءِ آمريڪي صدر ڊونلڊ ٽرمپ جي ميز تي موجودگي ضروري آھي. ان کان اڳ 22 آگسٽ تي روس جي پرڏيھي وزير سرگئي لاوروف چيو ھو ته روسي ۽ يوڪريني صدر وچ ۾ ڪا ملاقات طئي ناھي پر واضح ايجنڊا سامھون اچڻ تي صدر پيوٽن ملاقات لاءِ تيار آھي.
