تيانجن -31 آگسٽ (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار تيانجن ۾ لوبان ٽيڪنيڪل اينڊ ووڪيشنل ايجوڪيشن اينڊ ٽريننگ (ٽي وي اي ٽي) نمائش هال جو دورو ڪيو، جتي هن کي لوبان ورڪشاپس جي ڪم ۽ پاڪستان سان جاري سهڪار جي باري ۾ بريفنگ ڏني وئي. نائب وزيراعظم ۽ پرڏيهي وزير چين جي ميزبانن سان لوبان فريم ورڪ تحت سهڪار کي وڌيڪ گهرو ڪرڻ تي به ڳالهيون ڪيون، خاص طور تي نئين ۽ اڀرندڙ صنعتن ۾ فني ۽ پيشيواراڻي تعليم ۾ گڏيل ڪوششن کي وڌائڻ تي زور ڀريو. هن ان ڳالهه کي به اجاگر ڪيو ته پاڪستان ۽ چين وچ ۾ ٽي وي اي ٽي تعاون کي مضبوط بڻائڻ پائيدار اقتصادي ترقي جا موقعا پيدا ڪرڻ ڏانهن هڪ اهم قدم آهي. محمد اسحاق ڊار چيو ته هي تعاون نه رڳو پاڪستان جي انساني وسيلن کي بهتر بڻائي ٿو پر ٻنهي ملڪن جي اقتصادي شراڪتداري کي به وسعت ڏئي ٿو. دوري دوران نائب وزيراعظم، انهن پاڪستانين سان به ملاقات ڪئي جيڪي لوبان انيشيٽو تحت تربيت حاصل ڪري رهيا آهن. هن ساڻن سندن تعليمي تجربن ۽ مستقبل جي امڪانن تي ڳالهيون ڪندي ان ڳالهه تي زور ڀريو ته پاڪستان جي نوجوان نسل کي جديد فني مهارتن سان ليس ڪرڻ وقت جي ضرورت آهي ته جيئن بدلجندڙ صنعتي ضرورتن کي پورو ڪري سگهجي. لوبان ورڪشاپس جو تيانجن ميونسپل اختيارين قائم ڪيو آهي، اعليٰ معيار جي فني تعليم جي سڄي دنيا ۾ هٿي ڏيڻ جو هڪ عالمي ماڊل بڻجي چڪو آهي. 2016ع کان هن وقت تائين 30 کان وڌيڪ ملڪن ۾ 36 ورڪشاپس قائم ڪيا ويا آهن، جيڪي مهارتن جي منتقلي، فني مٽاسٽا ۽ عوامي رابطن کي هٿي ڏيئي رهيا آهن. پاڪستان ۾ لوبان ورڪشاپ 2018ع ۾ لاهور ۾ قائم ڪيو ويو هو جيڪو مڪينيڪل انجنيئرنگ، آٽوميشن ۽ انفارميشن ٽيڪنالاجي جهڙن شعبن ۾ تربيت فراهم ڪري رهيو آهي. پاڪستان تربيت وٺندڙ شاگردن کان علاوه هن وقت 7 پاڪستاني شاگرد چين ۾ لوبان ٽريننگ حاصل ڪري رهيا آهن.
