اسلام آباد-31 آگسٽ(اي پي پي) ايشيائي ترقياتي بئنڪ(اي ڊي بي) جي صدر ماساٽوڪانڊا پاڪستان جي ٽن ڏينهن جي دوري کانپوءِ هر چئلنج ۽ موقع تي پاڪستان جي مدد ڪرڻ جي بئنڪ جي عزم جو ورجاءُ ڪيو آهي. پنهنجي آفيشل ايڪس هينڊل تي هڪ پوسٽ ۽ وڊيو ڪلپ ۾ هن چيو ته هن هفتي ۾ پاڪستان ۾ تباهي آڻيندڙ بحران ۽ قابل ذڪر لچڪ ٻنهي جو مشاهدو ڪيو آهي، پاڪستان ڏهاڪن کان بدترين ٻوڏ کي منهن ڏئي رهيو آهي، سانوڻي برساتن 10 لک کان وڌيڪ ماڻهن کي لڏ پلاڻ تي مجبور ڪيو آهي. انساني هنگامي صورتحال جي جواب ۾ اي ڊي بي پاڪستان جي درخواست تي پنهنجي ايشيا پيسفڪ ڊيزاسٽر رسپانس فنڊ ذريعي ٻوڏ جي بحالي جي ڪوششن ۾ مدد لاءِ 3 ملين ڊالر جي گرانٽ فراهم ڪندو. هن وڌيڪ چيو ته هي تيز رفتار ردعمل اي ڊي بي جي فوري ضرورت جي وقت پاڪستان سان گڏ بيهڻ جي عزم کي ظاهر ڪري ٿو. هن وڌيڪ چيو ته اسان ڊگهي مدي جي خوشحالي لاءِ حصيدار آهيون. هن پنهنجي دوري جي دوران وزيراعظم محمد شهباز شريف سان ملاقات ڪئي جنهن ۾ هن ٻوڏ متاثرن سان همدردي جو اظهار ڪيو. هن موسمياتي تبديلي جي سيڙپڪاري، نجي شعبي جي وڌندڙ شموليت ۽ عالمي سبز توانائي جي منتقلي لاءِ اهم معدنيات جي اسٽريٽجڪ سپلائر جي طور تي پاڪستان جي ڪردار تي به خيالن جي ڏي وٺ ڪئي. هن ان ڳالهه تي روشني وڌي ته بئنڪ ويجهڙائي ۾ ريڪوڊڪ لاءِ 410 ملين ڊالر جي فنانسنگ پيڪيج جي منظوري ڏني آهي جنهن سان هزارين روزگار جا موقعا پيدا ٿيندا ۽ پاڪستان کي اهم معدنيات جي اهم سپلائر جي طور تي بهتر پوزيشن ۾ رکيو ويندو.
