اسلام آباد – 15 آگسٽ (اي پي پي) وزيراعظم محمد شهباز شريف اسلام آباد ۾ آءِ ٽي پارڪ جي تعمير جي سست رفتار تي ڪاوڙ جو اظهار ۽ لاڳاپيل عملدارن کان پڇاڻو ڪندي چيو آهي ته منصوبي ۾ عالمي معيار موجب سهولتن جي فراهمي کي يقيني بڻايو وڃي، سمورا ذميوار ان منصوبي جي تڪميل جي لاءِ پنهنجون ڪوششون تيز ڪن. وزيراعظم آفيس جي ميڊيا ونگ پاران جاري بيان موجب وزيراعظم آزادي جي ڏهاڙي (14 آگسٽ) تي اسلام آباد ۾ تعمير هيٺ ٽيڪنالاجي پارڪ جو خصوصي دورو ڪيو، اهو وزيراعظم جو تعمير هيٺ آءِ ٽي پارڪ جو ٽيون دورو هو. منصوبابندي وارو وفاقي وزير احسن اقبال، اقتصادي معاملن وارو وفاقي وزير احد خان چيما، اطلاعات ۽ نشريات وارو وفاقي وزير عطاءُ الله تارڙ، انفارميشن ٽيڪنالاجي ۽ ٽيلي ڪام واري وفاقي وزير شزه فاطمه خواجه ۽ لاڳاپيل اعليٰ سرڪاري آفيسر پڻ وزيراعظم سان گڏ هئا. وزيراعظم ٽيڪنالاجي پارڪ جي تعمير جي سست رفتار تي ڪاوڙ جو اظهار ڪيو ۽ موقعي تي موجود لاڳاپيل عملدارن کان پڇاڻوڪيو، اهو منصوبو 23 مارچ 2025ع تي مڪمل ٿيڻو هو پر ان جي تعمير دير جو شڪار آهي، ياد رهي ان منصوبي تي پاڪستان تحريڪ انصاف جي حڪومت جي دور ۾ ڪو خاطرخواهه ڪم نه ٿي سگهيو هو. وزيراعظم محمد شهباز شريف چونڊجندي ئي آءِ ٽي پارڪ منصوبي تي خصوصي ڌيان ڏنو ۽ ڪم جي شروعات ڪرائي ڇڏي. وزيراعظم آءِ ٽي پارڪ کي جلد کان جلد مڪمل ڪرڻ جي هدايت ڪئي ۽ چيو ته ان منصوبي کي شروعاتي هدايت موجب ٻڌايل مدي ۾ مڪمل ڪيو وڃي، منصوبي ۾ عالمي معيار موجب سهولتن جي فراهمي کي يقيني بڻايو وڃي، سمورا ذميوار ان منصوبي جي تڪميل جي لاءِ پنهنجون ڪوششون تيز ڪن. وزيراعظم کي ٻڌايو ويو ته آءِ ٽي پارڪ 2 زمين هيٺ، گرائونڊ ۽ 9 مٿئين منزلن تي ٻڌل آهي، پارڪ ۾ آفيسون، انڪيوبيشن سينٽر، بزنس سپورٽ سينٽر، ار اينڊ ڊي ليبارٽريون، ليول ٿري ڊيٽا سينٽر، آڊيٽوريم ۽ 1200 گاڏين جي پارڪ شامل آهي. آءِ ٽي پارڪ جو مقصد نوجوانن جي لاءِ نوڪريون، معاشي واڌويجهه کي وڌائڻ، عالمي آءِ ٽي چٽاڀيٽي کي وڌائڻ ۽ ڊيجيٽل ورڇ کي ختم ڪرڻ آهي.
