اسلام آباد – 6 – آگسٽ (اي پي پي) اطلاعات ۽ نشريات واري وفاقي وزير عطاءُ الله تارڙ چيو آهي ته ايف آءِ اي بحريه ٽائون ڪرپشن ڪيس ۾ هڪ ارب 12 ڪروڙ رپين جي مني لانڊرنگ جا ناقابل ترديد ثبوت حاصل ڪري ورتا آهن، سفاري اسپتال کي مني لانڊرنگ جي لاءِ فرنٽ آفيس جي طور تي استعمال ڪيو ويو جڏهن ته رڪارڊ ۽ ڪيش جي منتقلي ايمبوليس جي ذريعي ڪئي ويندي رهي، هي هڪ منظم ڪرپشن نيٽ ورڪ هو جنهن جي ذريعي اربين رپيا غيرقانوني طريقي سان ٻاهرئين ملڪ منتقل ڪيا ويا. اهم ڳالهه ٻولهه ڪندي اطلاعات واري وفاقي وزير چيو ته بحريه ٽائون ڪرپشن ڪيس جي جاچ ۾ وڏي اڳڀرائي سامهون آئي آهي. اها ڪارروائي ايف آءِ اي جي جاري جاچ جو حصو هئي جنهن ۾ ڇاپن جي ذريعي ثبوت ۽ دستاويز گڏ ڪيا پيا وڃن. اهو رڪارڊ سمورين ٽرانزيڪشنز ۾ هنڊي ۽ حواله جي غيرقانوني طريقن کي ثابت ڪري ٿو، ان رڪارڊ کي اسپتال ۾ ان لاءِ رکيو ويو هو ته ڪنهن کي شڪ نه ٿئي ۽ وڏي چالاڪي سان اسپتال کي فرنٽ آفيس جي طور تي استعمال ڪيو ويو. وفاقي وزير چيو ته ڇاپي دوران بحريه ٽائون جي ڪرنل (ر) خليل کي حراست ۾ ورتو ويو، ان کانسواءِ عمران ۽ قيصر نالي ماڻهو جيڪي هنڊي حوالا جو نيٽ ورڪ هلائي رهيا هئا، جي بحريه ٽائون جي چيف فنانشل آفيسر عامر رشيد ۽ ڊائريڪٽر فنانس شاهد قريشي سان رابطي جا ثبوت پڻ حاصل ٿي چڪا آهن، انهن تي اڳ ۾ به ڪيسز آهن، اهو تمام وڏو مني لانڊرنگ جو نيٽ ورڪ هو جنهن جي ذريعي پاڪستان کان ٻاهر وڏي رقم منتقل ڪئي پئي وئي. هن چيو ته وڌيڪ رقم جي منتقلي جو انڪشاف پڻ متوقع آهي، اڃا جاچ جي رڳو شروعات آهي، جنهن ۾ ملڪ رياض ۽ بحريه ٽائون جي خلاف اهي ثبوت سامهون آيا آهن. وفاقي وزير چيو ته ايف آءِ اي سمورا ثبوت پنهنجي قبضي ۾ وٺي ڇڏيا آهن. هن چيو ته اسپتال جي اندر موجود سيٽ اپ ان ڳالهه جو ثبوت آهي ته ڪهڙي طرح هڪ ميگا ڪرپشن اسڪينڊل جي ذريعي ملڪ کي معاشي نقصان پهچايو پئي ويو. اهي اربين رپيا غيرقانوني طريقي سان ٻاهرئين ملڪ ويا. هن چيو ته جيئن ئي ايف آءِ اي جي ٽيم ڇاپو هنيو ته بحريه ٽائون جي اهلڪارن رڪارڊ ساڙڻ جي ڪوشش ڪئي، ڪجهه رڪارڊ سڙي ويو، پر گهڻو رڪارڊ ايف آءِ اي قبضي ۾ وٺي ڇڏيو آهي. ايف آءِ اي جي ٽيم جڏهن پهتي ته ان وقت رڪارڊ کي باقاعده باهه لڳائي پئي وئي. ايف آءِ اي سڙڻ کان بچي ويل رڪارڊ هٿ ڪري ورتو آهي. هن چيو ته سوال اهو آهي ته جيڪڏهن اهو رڪارڊ غيرقانوني نه هو ۽ اسپتال ۾ ڪا غيرقانوني سرگرمي نه ٿي رهي هئي ته ان کي ساڙڻ جي ضرورت ڇو پئي؟ اهو عمل ملڪ رياض، بحريه ٽائون انتظاميا ۽ ان جي پوري گروپ جي ڏوهه کي ثابت ڪري ٿو. وفاقي وزير عطاءُ الله تارڙ چيو ته ايف آءِ اي جي جاچ ۾ وڌيڪ اڳڀرائي ٿي رهي آهي، ايندڙ ڏينهن ۾ وڌيڪ انڪشاف متوقع آهن. هن چيو ته ان مڪروهه ڌنڌي ۾ اربين رپين جي ميگا ڪرپشن ٿي آهي. اهي سمورا ثبوت قوم آڏو موجود آهن، جن مان ثابت ٿئي ٿو ته ملڪ رياض ۽ بحريه ٽائون هنڊي حوالا جي ذريعي اربين رپيا ملڪ کان ٻاهر موڪليا جيڪو ڏوهه آهي ۽ ان ۾ ڪرپشن به ثابت آهي، وقت سان گڏ وڌيڪ تفصيل عوام جي سامهون پيش ڪيا ويندا. هن چيو ته هنڊي حوالا جو نيٽ ورڪ ۽ غيرقانوني ڪرپشن وڌيڪ دير تائين نه ٿي لڪي سگهي، عوام جو حق آهي ته انهن جي سامهون سموريون حقيقتون رکيون وڃن ۽ ان تي ڀرپور ڪارروائي ڪئي وڃي. هن چيو ته فرانزڪ آڊٽ کانپوءِ انهن دستاويزن سان وڌيڪ ثبوت سامهون ايندا. وفاقي وزير چيو ته اهي ماڻهو ڪڏهن مظلوم ٿي وڃن ٿا پر حقيقت ۾ انهن ملڪ کي اربين رپين جو نقصان پهچايو آهي ۽ هاڻي انهن کي هر سطح تي جواب ڏيڻو پوندو. هن چيو ته جيڪي ماڻهو مفرور آهن انهن جي لوڪيشنز به ايف آءِ اي وٽ پهچي رهي آهي. پنهنجو پاڻ کي قانون جي حوالي ڪري ڇڏين ڇو ته جڏهن ڏوهه ثابت ٿي چڪو هجي ته ڀڄڻ مان فائدو نه آهي جهڙي طرح انهن دستاويز ساڙڻ جي ڪوشش ڪئي، اهو ان ڳالهه جو ثبوت آهي ته ملڪ رياض ۽ بحريه ٽائون گروپ ڪرپشن، غيرقانوني سرگرمين ۽ مني لانڊرنگ ۾ سڌوسنئون ملوث آهن. انشاءَالله انصاف ضرور ٿيندو. اطلاعات واري وفاقي وزير عطاءُ الله تارڙ چيو ته بحريه ٽائون جي رهواسين کي ڪنهن به قسم جو خطرو نه آهي، انهن جا حق محفوظ آهن، اها ڪارروائي رڳو ملڪ رياض، بحريه ٽائون جي آفيشلز ۽ خاندان جي انهن ماڻهن جي خلاف آهي جيڪي غيرقانوني سرگرمين ۾ ملوث آهن.
