اسلام آباد-06 آگسٽ (اي پي پي) گهرو معاملن واري مملڪتي وزير طلال چوڌري چيو آهي ته راولپنڊي ۽ اسلام آباد کي پاڻي جي فراهمي جي ميگا پراجيڪٽ لاءِ وزيراعظم اعليٰ سطح جي ڪميٽي جوڙي ڇڏي آهي، پاڻيءَ جي سطح بلند ڪرڻ لاءِ سي ڊي اي بلڊنگ باءِ لاز ۾ تبديلي ڪئي آهي، هاڻ زمين مان بورنگ ذريعي پاڻي ڪڍڻ تي سختي ڪئي پئي وڃي. قومي اسيمبليءَ ۾ انجم عقيل خان جي اسلام آباد ۾ پاڻيءَ جي سطح خطرناڪ حد تائين گهٽ ٿيڻ جي حوالي سان ڌيان ڇِڪرايو نوٽيس جو جواب ڏيندي هن ٻُڌايو ته اسلام آباد ۾ 1960ع ۾ زمين هيٺان پاڻيءَ جي سطح 10 ميٽر هئي جيڪا هاڻ 120 ميٽر کان وڌي وئي آهي، ان جا ڪارڻ آباديءَ ۾ واڌ ۽ شهر جي پکيڙ آهي. اسلام آباد ۾ پاڻيءَ جي ڏهاڙي ضرورت 120 ملين گيلن آهي، جنهن مان سي ڊي اي 60 ملين گيلن فراهم ڪري رهيو آهي، سي ڊي اي شهري علائقن ۾ 90 سيڪڙو ۽ ٻهراڙي وارن علائقن ۾ 15 کان 20 سيڪڙو ضرورت پوري ڪري رهيو آهي. ان مسئلي جي حل لاءِ ميگا واٽر پراجيڪٽ جي ضرورت آهي، ان لاءِ وزيراعظم ڪميٽي جوڙي ڇڏي آهي، ان جي فزيبلٽي اسٽڊي تي ڪم جاري آهي. هن ٻُڌايو ته زمين ۾ پاڻيءَ جي سطح بلند ڪرڻ لاءِ سي ڊي اي بلڊنگ باءِ لاز ۾ تبديلي ڪئي آهي، اربن واٽر هارويسٽنگ لاءِ کوهه ٺاهيا ويا آهن، گهريلو ۽ ڪمرشل نئين عمارتن جي تعمير لاءِ ايس او پيز تحت لازمي آهي ته برسات جو پاڻي زمين ۾ داخل ڪرڻ لاءِ انتظام ڪري ته جيئن زمين هيٺان پاڻي ري چارج ٿي سگهي. هن ٻُڌايو ته زمين مان پاڻي ڪڍڻ تي سختي ڪئي پئي وڃي ۽ ان لاءِ سنگجاني واٽر ٽريٽمينٽ پلانٽ ۽ خان پور مان ٽينڪرن ذريعي شهري ضرورتون پوريون ڪيون پيون وڃن. ڊاڪٽر طارق فضل چوڌري ٻُڌايو ته اسلام آباد ۾ پاڻيءَ جي سپلاءِ شهري علائقن تائين محدود آهي. ٻهراڙي وارن علائقن ۾ 12 لک آباديءَ کي پاڻي فراهم نه پيو ڪيو وڃي. حڪومت ڪوششون ڪري رهي آهي ته ان سلسلي ۾ هڪ اعليٰ سطح جي ڪميٽي بڻائي وڃي. اسلام آباد ۾ چراه ۽ شاهده سمال ڊيم ۽ـ پنڊي ۾ به اهڙيءَ طرح سمال ڊيمز جي تعمير لاءِ منصوبا بندي ڪئي پئي وڃي. اسان پنهنجي حڪومتي دؤر ۾ اهو مسئلو حل ڪري وٺنداسين.
