اسلام آباد – 6 – آگسٽ (اي پي پي) وزيراعظم محمد شهباز شريف جناح ميڊيڪل ڪمپليڪس جي تعمير ۾ اسپيشلائيزڊ هيلٿ ڪيئر جي عالمي معيار کي نظر ۾ رکڻ جي هدايت ڪندي چيو آهي ته جناح ميڊيڪل ڪمپليڪس آزاد ڪشمير ۽ گلگت بلتستان سميت چئني صوبن جي مريضن جي لاءِ عالمي معيار جي اسپتال هوندي. وزيراعظم محمد شهباز شريف جي صدارت ۾ جناح ميڊيڪل ڪمپليڪس جي تعمير تي اڳڀرائي جو جائزو وٺڻ جي لاءِ اجلاس ٿيو. وزيراعظم آفيس جي ميڊيا ونگ پاران جاري بيان موجب وزيراعظم هدايت ڪئي ته جناح ميڊيڪل ڪمپليڪس جي مختلف بلاڪس کي صوبن سان ڳنڍيو وڃي، جناح ميڊيڪل ڪمپليڪس جي تعمير، عملي جي ڀرتي ۾ شفافيت ۽ ميرٽ کي اولين ترجيح ڏني وڃي، تعميري ڪم جي معيار کي اولين بڻائڻ ۽ شفافيت جي لاءِ ٿرڊ پارٽي ويليڊيشن يقيني بڻائي وڃي. وزيراعظم هدايت ڪئي ته وڏين اسپتالن تي مريضن جو دٻاءُ گهٽ ڪرڻ جي لاءِ اسلام آباد ۾ پرائمري ۽ سيڪنڊري هيلٿ ڪيئر جي نظام جي بهتري جو منصوبو پيش ڪيو وڃي. هن چيو ته الله جي فضل ۽ ڪرم سان پي ڪي ايل آءِ بهترين طريقي سان مريضن جي خدمت ڪري رهيو آهي، جناح ميڊيڪل ڪمپليڪس کي پاڪستان ڪڊني اينڊ ليور انسٽيٽيوٽ اينڊ ريسرچ سينٽر (پي ڪي ايل آءِ) کان به بهتر ۽ عالمي معيار جي سهولتن سان ليس اسپتال بڻائينداسين. هن اسپتال ۾ جينٽوريل سميت سمورين ٻين لاڳاپيل سروسز کي ميرٽ تي آئوٽ سورس ڪرڻ جي پڻ هدايت ڪئي. اجلاس ۾ وزيراعظم کي اسپتال جي ڪسنپٽ ڊيزائن، بورڊ جي جوڙجڪ، زمين ۽ اسپتال سان لڳولڳ تجويز ڪيل ڪمرشل سينٽر جي حوالي سان اڳڀرائي کان آگاهه ڪيو ويو. اجلاس کي ٻڌايو ويو ته ڪنسپٽ ڊيزائن، زمين جي منتقلي ۽ بورڊ جون مقرريون حتمي مرحلن ۾ آهن، تعمير جي بهترين معيار کي يقيني بڻائڻ جي لاءِ جيو ٽيڪ اسٽڊي ۽ اسپتال جي اسلام آباد ۽ ڀرپاسي جي رهواسين جي لاءِ لاڀائتو هجڻ جي حوالي سان سوشل امپيڪٽ اسٽڊيز جاري آهي. اجلاس کي مختلف قدمن جي مقرر مدي ۽ هدفن تي پڻ بريفنگ ڏنيو ئي. اجلاس ۾ وفاقي وزيرن احسن اقبال، احد خان چيما، سيد مصطفيٰ ڪمال، وزيراعظم جي صحت واري ڪوآرڊينيٽر ڊاڪٽر مختار ڀرٿ، پي ڪي ايل آءِ جي چيئرمين پروفيسر ڊاڪٽر سعيد اختر ۽ لاڳاپيل اعليٰ عملدارن شرڪت ڪئي.
