اسلام آباد-06 آگسٽ (اي پي پي) پاڪستان اسٽاڪ ايڪسچينج ۾ ڪاروباري هفتي جي ٽئين ڏينهن اربع تي غير معمولي تيزي ڏسڻ ۾ آئي، جڏهن ڪي ايس اي 100 انڊيڪس ۾ 1145 پوائنٽس جو اضافو رڪارڊ ڪيو ويو جنهن کانپوءِ انڊيڪس 144182 جي بلند ترين سطح تي پهچي ويو. مارڪيٽ جي ان شاندار ڪارڪردگي جو وڏو سبب حڪومت طرفان جاري ڪيل مالي سال 25-2024ع جي مالياتي انگ اکر آهن، جن موجب مالي خسارو 5.38 سيڪڙو رهيو جيڪو گذريل سال 9 سالن جي گهٽ ترين سطح آهي. مالياتي نظم ۽ ضبط، محصول ۾ 36 سيڪڙو جو ساليانو اضافو ۽ خرچن ۾ محدود 18 سيڪڙو جو اضافو سيڙپڪارن جي اعتماد جو ثبوت بڻيو. پاڪستان اسٽاڪ ايڪسچينج جي ويب سائيٽ موجب اربع جي صبح 444 ڪمپنين جي شيئرز جي ڏي وٺ ٿي، جن مان 294 ڪمپنين جي شيئرز جي قيمتن ۾ اضافو، 130 ڪمپنين جي شيئرز جي قيمتن ۾ گهٽتائي جڏهن ته 20 ڪمپنين جي شيئرز جي قيمتن ۾ استحڪام ڏٺو ويو. ڪاروباري هفتي جي ٻي ڏينهن به مارڪيٽ ۾ 1189 پوائنٽس جو اضافو رڪارڊ ٿيو هو، جنهن سان انڊيڪس 143000 پوائنٽس جي سطح عبور ڪري ويو هو. فوجي فرٽيلائيزز، يونائٽيڊ بئنڪ، ايم سي بئنڪ، حب پاور ۽ اينگرو فرٽيلائيز جهڙن نمايان ادارن مجموعي طور تي انڊيڪس ۾ 679 پوائنٽس جو اضافو ڪيو، پاڪستان پيٽروليم، بئنڪ الحبيب ۽ حبيب بئنڪ جي شيئرز ۾ گهٽتائي سان 142 پوائنٽس جو ناڪاري اثر به ڏسڻ ۾ آيو. ان تيزي جو هڪ ٻيو اهم سبب حڪومت طرفان مڪمل فنڊ ڊريمينٽس اسڪيم لاءِ سبسڊي جي بحالي ۽ بجلي جي شعبي ۾ گردشي قرضن جي مسئلي جي امڪاڻي حل جون خبرون به آهن، جن مارڪيٽ ۾ اعتماد کي وڌيڪ مضبوط ڪيو، عملدارن چيو آهي ته جيڪڏهن اهو ئي رجحان برقرا رهيو ته ايندڙ ڪجهه سيشنز جي سيڙپڪاري لاءِ نوان موقعا ۽ ملڪي معيشت ۾ بهتري جا وڌيڪ آثار ڏسڻ لاءِ ملي سگهن ٿا.
