اسلام آباد – 15 – جولائي (اي پي پي) صدر آصف علي زرداري سان وزيراعظم محمد شهباز شريف ايوان صدر ۾ ملاقات ڪئي ۽ ملڪ جي سياسي، معاشي ۽ سيڪيورٽي صورتحال تي خيالن جي ڏي وٺ ڪئي. ايوان صدر جي پريس ونگ پاران جاري بيان موجب ملاقات ۾ دفاع وارو وفاقي وزير خواجه محمد آصف، منصوبابندي، ترقي ۽ خصوصي قدمن وارو وفاقي وزير احسن اقبال، قانون ۽ انصاف وارو وفاقي وزير سينيٽر اعظم نذير تارڙ، گهرو معاملن وارو وفاقي وزير محسن نقوي ۽ وزيراعظم جو سياسي معاملن وارو صلاحڪار راڻا ثناءُ الله پڻ موجود هئا. ملاقات ۾ ملڪ جي سياسي، معاشي ۽ سيڪيورٽي صورتحال تي خيالن جي ڏي وٺ ڪئي وئي. ملڪ ۾ امن امان جي صورتحال ۽ دهشتگردي جي خلاف قدمن تي پڻ ڳالهه ٻولهه ٿي. وزيراعظم معيشت جي بهتري جي لاءِ حڪومتي قدمن بابت صدر کي آگاهه ڪيو. ٻنهي اڳواڻن ملڪي استحڪام، ترقي ۽ خوشحالي جي لاءِ گڏجي ڪم ڪرڻ جي عزم جو ورجاءُ ڪيو.
