واشنگٽن-02 ڊسمبر (اي پي پي) آمريڪا جي قومي سلامتي بابت مشير جيڪ سليوان چيو آھي ته اسان جو ملڪ غزه ۾ جنگبندي ۽ قيدين جي آزادي لاءِ سمجھوتي تي ڪم ڪري رھيو آھي، جيڪو اڃا تائين ممڪن ناھي ٿي سگھيو. پرڏيھي خابرو اداري مطابق ھن چيو ته اسان ان معاملي ۾ سمورين سرگرمين سان ڪم ڪري رھيا آھيون ته جيئن اھو سمجھوتو ٿي وڃي. ان سلسلي ۾ علائقي جي لاڳاپيل ماڻھن سان رابطي ۾ آھيون ۽ مسلسل ڪوششون ڪري رھيا آھيون، اميد آھي ته اسان جنگبندي ۽ قيدين جي آزادي لاءِ ڪامياب ٿينداسين. ٻئي پاسي والاريل بيت المقدس ۾ اسرائيل جي پرڏيھي وزير گيڊون ساعر چيو آھي ته غزه ۾ قيدين جي آزادي کي يقيني بڻائڻ جي معاھدي تي اشارن جي صورت ۾ اڳڀرائي ٿي سگھي ٿي. ھن چيو ته اميد آھي ته ان معاملي ۾ اڳڀرائي ٿيندي ڇو ته اسان قيدين جي واپسي لاءِ پرعزم آھيون. جيڪ سليوان جا اھي خيال ان وقت سامھون آيا آھن جڏھن اسرائيل لبنان سان جنگبندي جي معاھدي کانپوءِ به لبنان ۾ حزب الله کي بمباري جو ھدف بڻايو آھي.
