واشنگٽن- 5 جون (اي پي پي)آمريڪي صدر جو بائيڊن هلندڙ هفتي يوڪرين جي صدر ولاديمير زيلنسڪي سان ملاقات ڪندو. وائيٽ هائوس پاران جاري ڪيل پڌرائي مطابق صدر جو بائيڊن هلندڙ هفتي فرانس جي شهر نارمنڊي ۾ يوڪرين جي صدر ولاديمير زيلنسڪي سان ملاقات ڪندو جڏهن ته اٽلي ۾ جي – 7 اجلاس ۾ روس خلاف يوڪرين جي جنگ تي ڳالهيون ڪندو.آمريڪي قومي سلامتي جو مشير جيڪ سليوان پئرس جي سفر دوران ميڊيا کي ٻڌايو ته هن هفتي نارمنڊي ۾ ٻي عالمي جنگ جي ڊي ڊي لينڊنگ جي 80 هين ورسي جي موقعي تي صدر جو بائيڊن جي سندس يوڪرين جي هم منصب ولاديمير زيلنسڪي سان ملاقات متوقع آهي. هن ٻڌايو ته صدر جو بائيڊن 13 کان 15 جون تائين اٽلي جي شهر باري ۾ جي – 07 اجلاس يوڪرين جي صدر سان ملاقات ڪرڻ لاءِ به تيار آهي. جتي يوڪرين جي جنگي ڪوششن جي حمايت لاءِ منجمند روس جي فنڊن جي استعمال تي ڳالهيون پڻ متوقع آهن. ان کان علاوه صدر جو بائيڊن جي- 7 اجلاس جي ترت ئي سوئٽزرلينڊ جي شهر لوسرن ۾ منعقد ٿيندڙ يوڪرين بابت سربراهي اجلاس ۾ شرڪت ناهي ڪري رهيو.
