جده- 20 فيبروري (اي پي پي) اسلامي تعاون تظيم (او آءِ سي) جي سڌ سماءَ وارن وزيرن جو غير معمولي اجلاس 24 فيبروريءَ تي استنبول ۾ ٿيندو. اجلاس ۾ والاريل فلسطيني علائقي ۾ صحافين ۽ ميڊيا ادارن خلاف اسرائيل جي قابض انتظاميه جي ڏاڍ ۽ غلط ڄاڻ جي مقابلي ڪرڻ لاءِ گڏيل ڪوششن تي خيالن جي ڏي وٺ ڪئي وئي. او آءِ سي طرفان اڱاري ڏينهن جده ۾ جاري بيان مطابق ترڪي ان ڪانفرنس جي ميزباني او آءِ سي جي سڌ سماءَ وارن وزيرن جي موجوده چيئرمين جي حيثيت سان ڪري رهيو آهي. اميد آهي ته او آءِ سي جا ميمبر ملڪن ان ڪانفرنس ۾ شرڪت ڪندا. او آءِ سي جي سيڪريٽري جنرل حسين ابراهيم طحه ڪانفرنس کي خطاب ڪندو ۽ شرڪت ڪندڙن کي والاريل فلسطيني جي علائقي خاص طور تي غزه ۾ مختلف ميڊيا ادارن ۽ صحافين خلاف اسرائيل جي جاري ڏوهن کان آگاهي فراهم ڪندو. اها ڳالهه ذڪر جوڳي اهي ته اسرائيل غزه جي پٽي ۽ سڄي فلسطين ۾ ميڊيا کي دٻائي رکيو آهي. او آءِ سي پنهنجي بيان ۾ رپورٽن جي حوالي سان چيو ته اسرائيل 140 کان وڌيڪ ميڊيا ادارن کي نشانو بڻايو آهي جنهن سبب 7 آڪٽوبر 2023ع کان ميڊيا جي شعبي ۾ ڪم ڪندڙ گهٽ ۾ گهٽ 126 ماڻهو شهيد ٿيا آهن. بيان مطابق اسرائيل غزه جي پٽي جي عوام خلاف 4 مهينن کان وڌيڪ عرصي سان مسلسل جنگ جاري رکي آهي جنهن جي نتيجي ۾ قتل عام، ملڪيتن جي تباهين ۽ وڏي انگ ۾ فلسطيني بي گهر ٿيا آهن.
