اسلام آباد-18 جنوري (اي پي پي) آمريڪا پاڪستان،عراق ۽ شام ۾ ايراني حملن جي مذمت ڪئي آهي، آمريڪي پرڏيهي کاتي جي ترجمان ميٿيوملر پريس بريفنگ دوران چيو ته اسان ايران پاران ٽن ملڪن جي حدن ۾ حملا ڪرڻ جي سخت لفظن ۾ مذمت ڪيون ٿا. هن وڌيڪ چيو ته اسان ڪجهه ڏينهن کان ايران کي پنهجي ٽن پاڙيسري ملڪن جي خودمختياري ۽ سرحدن جي خلاف ورزي ڪندي ڏسي رهيا آهيون، هڪ سوال جي جواب ۾ هن چيو ته ايران جي قول ۽ فعل ۾ فرق آهي، ايران هڪ طرف خطي ۾ دهشتگردي ۽ عدم استحڪام لاءِ فنڊنگ ڪري ٿو جڏهن ته ٻئي پاسي ايران دهشتگردي خلاف ڪاروايون ڪرڻ جو دعويدار آهي، هڪ سوال جي جواب ۾ آمريڪي ترجمان چيو ته اسان احمر سمنڊ ۾ حوثين پاران وڌنڌڙ حملن جي پڻ مذمت ڪيون ٿا.
