مدينو شريف – 07 جولاءِ (اي پي پي) سعودي حج ۽ عمري واري وزارت چيو آهي ته حج جي ادائگي کانپوءِ هن وقت تائين مديني شريف پهچندڙ حاجين جو انگ هڪ لک 42 هزار کان وڌي ويو آهي. سعودي خابرو اداري مطابق سعودي حج ۽ عمري واري وزارت طرفان جاري بيان ۾ چيو ويو آهي ته حج کانپوءِ هن وقت تائين مديني شريف ايندڙ حاجين جو تعلق مختلف ملڪن سان آهي جيڪي بسن ۽ حرمين ٽرين کان علاوه فضائي ذريعي پڻ مديني شريف پهچي ويا آهن. وزارت چيو ته الهجره شاهراه تي قائم حاجين جي آجيان ڪندڙ مرڪز تي ايندڙ حاجين جو انگ 17 هزار 258 رهيو جيڪي بسن جي ذريعي مڪي شريف کان هتي پهتا. حرمين ٽرين ذريعي 1797 حاجي مديني شريف آيا. حاجين جو مديني شريف آمد ۽ اتان پنهنجن ملڪن کي روانگي جو سلسلو جاري آهي. حاجين جي روانگي جي حوالي سان وزارت چيو ته هن وقت تائين مديني جي زيارت ڪرڻ کانپوءِ 36 هزار 963 حاجي پنهنجن ملڪن ڏانهن روانو ٿي چڪا آهن. هن وقت هڪ لک 5 هزار 617 حاجي مديني شريف ۾ موجود آهن جن جو تعلق مختلف ملڪن سان آهي.
