پيرس -20 جون (اي پي پي)سعودي ولي عهد شهزاده محمد بن سلمان پيرس ۾ ايڪسپو 2030ع جي ميزباني لاءِ نامزدگي جي حوالي سان سعودي عرب جي سرڪاري آجياڻي تقريب ۾ شرڪت ڪئي. سعودي خابرو اداري مطابق بيورو انٽرنيشنل ڊيس ايڪسپوزيشنز جيڪو اها نمائش منعقد ڪري رهيو آهي، ان جي 179 ميمبر ملڪن جي نمائندن تقريب ۾ شرڪت ڪئي. خابرو اداري مطابق اها آجياڻي واري تقريب ايڪسپو جي ميزباني لاءِ ملڪن جي نامزدگي جي طريقيڪار جو هڪ اهم حصو آهي. ان جو مقصد عالمي ايونٽ جي ميزباني لاءِ رياض جي تياري ۽ رٿابندي کي اجاگر ڪرڻ آهي. ياد رهي ورلڊ ايڪسپو 2030ع جي ميزبان ملڪ جي چونڊ لاءِ ووٽنگ هن سال نومبر ۾ ٿيندي. ايڪسپو 2030ع جي ميزباني جي ڊوڙ ۾ سعودي عرب سان ڪورين سٽي پوسان، يوڪرين جو شهر اوڊيسا ۽ اٽلي جو شهر روم شامل آهن. رياض ايڪسپو 2030ع لاءِ پهرين آڪٽوبر 2030ع جي تاريخ تجويز ڪئي وئي آهي جيڪا مارچ 2031ع تائين جاري رهندي.
