اسلام آباد – 12 – ڊسمبر (اي پي پي) اطلاعات ۽ نشريات واري وفاقي وزير مريم اورنگزيب چيو آهي ته ٻين کي چور چوندڙ عمران خان پاڻ زڪوات جو پئسو چوري ڪندي پڪڙيو ويو آهي، عمران خان ذهني مريض بڻجي چڪو آهي، ملڪ کي باهه، وفاق جي ڌرين کي ورڇ ۽ ملڪ جا ڪيترائي ٽڪرا ڪرڻ چاهي ٿو، عمران خان سياسي مخالفن تي ٺاهيل ڪوڙا ڪيس عدالت ۾ ثابت نه ڪري سگهيو، عمران خان ڊيلي ميل ۾ پلانٽيڊ اسٽوري ڇپرائي، عمران نيازي جي الزام بازين سان ملڪي ساک کي نقصان پهتو، برطانوي نيشنل ڪرائيم ايجنسي شريف فيملي کي ڪلين چٽ ڏني، عمران خان لنڊن هاءِ ڪورٽ ۾ به الزامن جو ڪو ثبوت پيش نه ڪري سگهيو، ڊيلي ميل غيرمشروط معافي ورتي آهي، ڊيلي ميل جي معافي وٺڻ سان هر پاڪستاني جي عزت ۾ اضافو ٿيو، نواز شريف جي حڪومت ۾ ملڪ تيزي سان ترقي ڪري رهيو هو، عمران نيازي ملڪ کي ڏيوالپڻو جي ويجهو پهچايو. هو پارليامينٽ هائوس ۾ اجلاس دوران ڳالهائي رهي هئي. اطلاعات واري وفاقي وزير مريم اورنگزيب چيو ته اظهار راءِ جي آزادي سڀني جو هق آهي پر ان اظهار راءِ جي ذريعي ڪنهن تي حملي آور نه ٿيڻ گهرجي، پرڏيهي معاملن واري مملڪتي وزير حنا رباني کر سان منهنجو هڪ سٺو تعلق آهي، هو عورت هجڻ جي ناطي نه پر پنهنجي مهارت جي بنياد تي ان عهدي ي ويٺل آهي. هن چيو ته ملڪي تاريخ ڀري پئي آهي ته ڪهڙي طرح عورتن جمهوريت ۽ ملڪي ترقي جي لاءِ خدمتون سرانجام ڏنيون، محترمه فاطمه جناح، بيگم ڪلثوم نواز ۽ منهنجي ماسيءَ نجمه حميد جي پڻ ملڪي ترقي جي لاءِ بي پناهه خدمتون آهن. هن چيو ته حنا رباني کر جي ڪاميابي سمورين عورتن جي لاءِ فخر جوڳي آهي، سٺي ڪم تي حوصلا افزائي ٿيڻ گهرجي ڇو ته ملڪي مجموعي آبادي جو 50 سيڪڙو عورتون آهن. هن چيو ته او آءِ سي اطلاعات وارن وزيرن جي ڪانفرنس ۾ 48 ميمبر ملڪ آهن، آئون واحد عورت اطلاعات واري وزير هيس، ڳالهه جنس جي نه پر قابليت جي هوندي آهي، حنا رباني کي طالبان جي ميز تي ويهي ڳالهه ڪري ٿي ته اهو اسان سڀني جي لاءِ فخر آهي. هن چيو ته 2018ع کان 2022ع تائين مخالف ڌر جا سمورا ماڻهو جيلن ۾ هئا، عمران خان جي جيل ڀريو مهم جو فوڪس سمورا مخالف هئا، ان شخص نه ڪنهن عورت، ڌيءَ، ڀيڻ يا ماءُ تائين جو خيال ڪيو سڀني کي جيلن ۾ رکيو، سياسي مخالفن تي ڪوڙا ڪيس ٺاهيندو رهيو، ان وقت جي نيب چيئرمين کي هڪ وڊيو جي بنياد تي اغوا ڪري عمران خان مرضي جا ڪيسز ٺاهيا، ان وقت جي ڊي جي ايف آءِ اي کي به مخالفن تي ڪيس ٺاهڻ جي لاءِ گهرايو جڏهن هن انڪار ڪيو ته ان کي فارغ ڪيو ويو، اهڙي طرح طيبه گل به نيب چيئرمين جي خلاف شڪايت کڻي وزيراعظم آفيس وئي ته ان کي اغوا ڪيو ويو. وفاقي وزير مريم اورنگزيب چيو ته اڄ ان فلور تي وفاقي گهرو وزير راڻا ثناءُ الله کي به مبارڪباد ڏيان ٿي جيڪو هڪ جعلي ڪيس ۾ باعزت بري ٿي چڪو آهي، ان کي ڀونڊي انداز سان ڦاسائڻ جي ڪوشش ڪئي وئي پر ناڪام ٿي، گذريل ڏينهن ڪيس جا ٽي گواهه بيان حلفي جمع ڪرايا ته اسان گواهي نه ڏئي رهيا آهيون جنهن تي عدالت فيصلو ڪندي راڻا ثناءُ الله خان کي باعزت بري ڪيو. هن انڪشاف ڪيو ته راڻا ثناءُ الله خان کي جڏهن ان ڪيس ۾ جيل ۾ رکيو ويو ته معمولي ڏوهه جي بيرڪ بدران کيس موت جي سزا جي چڪي ۾ رکيو ويو. ان بيرڪ ۾ کنڊ وجهي ڪيڙا ڇڏيا ويا، 2019ع ۾ انهي ايوان ۾ رڙيون ڪري ڪري چيو ويو ته راڻا ثناءُ الله منشيات اسمگلنگ جي عالمي گروهه جو حصو آهي. هن چيو ته 2005ع زلزلي امدادي سامان بابت پروپئگنڊه ڪئي وئي ان وقت شهباز شريف پنجاب جو وڏو وزير نه هو، ڊيلي ميل کي نيب جي رڪارڊ تائين پهچ ڏني وئي، ايف آءِ اي جو رڪارڊ فراهم ڪيو ويو ۽ مرضي جي خبر پلانٽ ڪرائي وئي. ان وقت به برطانوي نيشنل ڪرائيم ايجنسي کي چيو هو ته اهو سڀ ڪجهه مفروضا آهن. هن چيو ته 2018ع ۾ جڏهن اسان جي حڪومت ختم ٿي ته جي ڊي پي 6.1 سيڪڙو، مهانگائي جي شرح 4 سيڪڙو، سي پيڪ منصوبو تيزي سان اڳتي وڌي رهيو هو. هي اهو ئي ملڪ آهي جيڪو چار سالن کانپوءِ ڏيوالپڻو ٿيڻ جي ويجهو پهچي ويو. هن چيو ته رياستي مشينري استعمال ڪندي مخالف ڌر اڳواڻ سميت سمورن مخالفن تي جعلي ڪيس ٺاهيا ويا، شهباز شريف جي خلاف ايفن سي اي 10 سالا دور جي جاچ ڪئي ٻئي طرف ڊيلي ميل جي خبر جي خلاف وزيراعظم شهباز شريف برطانوي عدالت ۾ هتڪ عزت جي دعويٰ ڪئي ته اخبار پاران ڪنهن به قسم جو ثبوت نه ٿو ڏئي سگهجي آخرڪار ڊيلي ميل غيرمشروط معافي وٺي ڇڏي. وفاقي وزير مريم اورنگزيب چيو ته عمران خان جي ان مهم جو مقصد ملڪ ۾ ايندڙ ٻاهرئين امدادي تنظيمن جي خدمت جي عمل کي روڪڻ هو. هن چيو ته اسان 40 سالن جو حساب ڏنو، نواز شريف ان وقت سپريم ڪورٽ کي خط لکيو هو، جڏهن عمران خان جي درخواست رديءَ جي ٽوڪري ۾ وڌي وئي هئي، هاڻي جڏهن عمران خان کان سوال ٿئي ٿو ته هو الزامن جي بوڇاڙ ڪري ڇڏي ٿو، توشه خانه مان خانه ڪعبه عڪس واري گهڙيءَ خريد ڪرڻ کانسواءِ وڪرو ڪئي وئي. وفاقي وزير مريم اورنگزيب تازي ٽيليفونڪ ڪال ليڪ جو ذڪر ڪندي ٻڌايو ته ان ڪال ۾ چيو وڃي ٿو ته خان صاحب جون گهڙيون وڪرو ڪرڻيون آهن، اهي گهڙيون خان صاحب جون نه آهن پر توشه خانه جون هيون. هن چيو ته اليڪشن ڪميشن جڏهن کان فارن فنڊنگ ڪيس جو فيصلو ڏنو تڏهن کان عمران خان جي نشاني تي آهي، هر ڏينهن چيف اليڪشن ڪمشنر جنهن جي مقرري پاڻ عمران خان ڪئي هئي تي الزام هڻڻ عمران خان جو معمول آهي. هن چيو ته عمران خان جلسي ۾ هڪ ڪاغذ لهرائي سازش ۽ امپورٽيڊ حڪومت جو بيانيو ٺاهيو، عمران خان وقت جي آرمي چيف جنرل قمر جاويد باجوه کي تاحيات توسيع جي آڇ ڪري ٿو ته ٻئي طرف پاڪ جي شهيدن جي خلاف مهم کي پاڻ ليڊ ڪندو هو، ملڪ جي پرڏيهي لاڳاپن کي عمران خان وڪرو ڪيو. هن چيو ته ٻين کي چور چوندڙ عمران خان پاڻ زڪوات جا پئسا چوري ڪندي پڪڙيو ويو آهي، عمران خان ذهني مريض بڻجي چڪو آهي، ملڪ کي باهه، وفاق جي ڌرين کي ورڇ ۽ ملڪ جا ڪيترائي ٽڪرا ڪرڻ چاهي ٿو. هن چيو ته عمران خان چوي ٿو ته ملڪ ۾ گئس نه آهي، ان وقت ايل اين جي ڇو نه خريد ڪئي جڏهن سستي ترين ايل اين جي ملي رهي هئي، ڇو بجلي گهر فرنس آئل تي هلايا ويندا رهيا. هن چيو ته سستي ايل ايل جي ملڪ ۾ آڻڻ جي پاداش ۾ عمران خان شاهد خاقان عباسي ۽ مفتاح اسماعيل کي جيلن ۾ وڌو، جيڪڏهن سڀ چور هئا ته اختيار، سرڪاري مشينري ۽ طاقت هوندي به هڪ الزام تائين ڇو نه ثابت ٿي سگهيو. هن چيو ته هر ڏينهن چيو ويندو آهي ته ملڪ ڏيوالپڻو ٿي رهيو آهي، ملڪ جيڪڏهن ڏيوالپڻو ٿيو به ته ان ۾ عمران خان جا اعمال سڀني کان مٿي هوندا ڇو ته چار سال هن ملڪ سان کيڏيو ويو.
