اسلام آباد – 16 – جنوري (اي پي پي) وزيراعظم محمد شهباز شريف يوٿ پروگرام تحت قرض جي رقم 5 لک مان وڌائي 15 لک رپيا ڪرڻ، ننڍي ۽ وچولي درجي جي ڪاروبار کي ڏني ويندڙ سهولتن کي عالمي گهرجن سان هم آهنگ ڪرڻ جي لاءِ ترقي يافته ملڪن جي ماڊلز کي لاڳو ڪرڻ کي يقيني بڻائڻ جي هدايت ڪندي چيو آهي ته ايس ايم ايز معيشت جي ترقي ۾ اهميت رکندڙ آهي، حڪومت نوجوانن کي ڪاروبار جي ترغيب ڏيڻ جي لاءِ سهولتون فراهم ڪندي. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف جي صدارت ۾ ننڍي ۽ وچولي درجي جي ڪاروبار (ايس ايم ايز) بابت جائزه اجلاس ٿيو. وزيراعظم ننڍي پئماني جي ڪاروبار جي لاءِ وزيراعظم يوٿ پروگرام تحت قرض جي رقم کي 5 لک مان وڌائي 15 لک رپيا ڪرڻ، سڄي ملڪ ۾ ننڍي ۽ وچولي درجي جي ڪاروبار کي سهولتن جي فراهمي جي لاءِ ان جو تفصيلي سروي جلد مڪل ڪرڻ ۽ ننڍي ۽ وچولي درجي جي ڪاروبار کي ڏني ويندڙ سهولتن کي عالمي گهرجن سان هم آهنگ ڪرڻ جي لاءِ ترقي يافته ملڪن جي ماڊلز کي لاڳو ڪرڻ کي يقيني بڻائڻ جي هدايت ڪئي. هن ننڍي پئماني جي ڪاروبار ۾ عورتن جي لاءِ خصوصي پئڪيج جوڙي جلد پيش ڪرڻ جي پڻ هدايت ڪئي. وزيراعظم چيو ته حڪومت شهرين کي ڪاروبار جي ترغيب ڏيڻ جي لاءِ ننڍي ۽ وچولي درجي جي ڪاروبار کي سهولت ڏيڻ جي لاءِ پرعزم آهي. سڄي دنيا ۾ ايس ايم ايز معيشت جي ترقي ۾ اهميت رکندڙ آهي. ايس ايم ايز کي فروغ ڏئي ملڪي روانگي واپار ۾ اضافو حڪومت جي اولين ترجيح آهي. حڪومت نوجوانن ۽ عورت انٽرپرينيورز کي ان قدر بااختيار بڻائڻ جي لاءِ ڪوششون ڪري رهي آهي ته اهي نه رڳو پاڻ روزگار ڪمائين پر روزگار جا وڌيڪ موقعا پيدا ڪن. اجلاس ۾ وزيراعظم جي خصوصي هدايتن جي روشني ۾ ايس ايم ايز جي ترقي ۽ سهولت جي لاءِ حڪومتي قدمن تي اڳڀرائي کان آگاهه ڪيو ويو. اجلاس کي ٻڌايو ويو ته وزيراعظم جي هدايت تي عملدرآمد ڪندي سمورين ڌرين کي اعتماد ۾ وٺڻ کانپوءِ ايس ايم ايز جي لاءِ قرض جي فارم کي وڌيڪ آسان ۽ سادو بڻايو ويو آهي ته جيئن وڌ کان وڌ ايس ايم ايز پنهنجي ڪاروبار جي بهتري جي لاءِ قرض جي سهولت مان فائدو کڻي سگهن. اجلاس کي ٻڌايو ويو ته ايس ايم ايز جي درجابندي ان حوالي سان ڪئي پئي وڃي ته سمورا ننڍا ۽ وچولي پئماني جا ڪاروبار حڪومتي معاونت ۽ سهولتن مان وڌ کان وڌ فائدو کڻي سگهن ۽ انهن کي وقت سر آسان شرطن تي قرضن جي فراهمي يقيني بڻجي. وزيراعظم جي هدايت تي ايس ايم ايز ۾ تمام ننڍي پئماني ۽ گهريلو عورتن جي ننڍي ڪاروبار جي سهولت لاءِ هڪ نئين ڪيٽيگري متعارف ڪرائي ويندي جنهن ۾ انهن کي قرض حاصل ڪرڻ ۾ آساني کان وٺي ڪاروبار جي بهتري جي لاءِ حڪومت معاونت حاصل ڪرڻ ۾ آساني ٿيندي. اجلاس کي پاڪستان جي ڳڻپ واري اداري پاران ٽن وڏن شهرن ۾ ايس ايم ايز جي انگن اکرن بابت آگاهه ڪيو ويو ۽ ٻڌايوويو ته ايندڙ ڪجهه مهينن ۾ پوري ملڪ ۾ موجود ايس ايم ايز کي بهتر سهولتن جي فراهمي جي منصوبابندي جي لاءِ سروي ڪئي ويندي. اجلاس ۾ وزيراعظم جي هدايت تي ايس ايم ايز کي مدد جي حڪومتي حڪمت عملي جي هدفن ۽ انهن جي تڪميل جي مدي ۾ جامع بريفنگ پڻ ڏني وئي. اجلاس کي ٻڌايو ويو ته سميڊا هلندڙ سال فيبروري تائين ايس ايم ايز جي لاءِ فنانشل لٽريسي ۽ تربيتي پروگرام جاري ڪندو. ان کانسواءِ جديد ٽيڪنالاجي سان متعارف ڪرائڻ جي لاءِ پروگرام کي هلندڙ سال جي وچ تائين حتمي شڪل ڏني ويندي. اجلاس کي ايس ايم ايز جي حوالي سان ملڪي روانگي واپار ۾ اضافي جي لاءِ جامع حڪمت عملي جي هدفن ۽ انهن جي مقرر مدي جي حوالي کان پڻ آگاهه ڪيو ويو. اجلاس کي عورت انٽرپرينيور جي ترقي جي لاءِ جوڙي ويندڙ پاليسي تي اڳڀرائي کان پڻ آگاهه ڪيو ويو. اجلاس ۾ وفاقي وزيرن راڻا تنوير حسين، احد خان چيما، مملڪتي وزير شزه فاطمه خواجه، اسٽيٽ بئنڪ جي گورنر جميل احمد، چئني صوبائي چيف سيڪريٽريز، ايس ايم ايز شعبي جي نمائندي ۽ لاڳاپيل اعليٰ عملدارن شرڪت ڪئي.
