اسلام آباد – 31 مئي (اي پي پي) وزيراعظم جي اطلاعات ۽ نشريات بابت خصوصي معاون ڊاڪٽر فردوس عاشق اعواڻ چيو آهي ته مخالف ڌر پنهنجي ڳالهائڻ جو جمهوري حق ته چاهي ٿي پر حڪومتي ميمبرن کي اهو حق ڏيڻ لاءِ تيار نه آهي، جمهوريت جو روئڻو روئندڙ صرف ٻڌائڻ چاهين ٿا، ٻڌڻ جو انهن ۾ حوصلو نه آهي، اجلاس نه ٿئي ته مخالف ڌر شور مچائيندي آهي ته اجلاس نه پيو گهرايو وڃي، جڏهن اجلاس ٿيندو آهي ته انهن وٽ جهيڙي کانسواءِ ڪا ايجنڊا ناهي هوندي. پنهنجي بيان ۾ وزيراعظم جي خصوصي معاون ڊاڪٽر فردوس عاشق اعواڻ چيو ته قومي ادارن جي خلاف سنگين ڏوهه ڪندڙ جوابدارن جي ترجماني بدران مخالف ڌر ايوان ۾ پنهنجو حقيقي پارلياماني ڪردار ادا ڪري.
