رياض – 23 آڪٽوبر (اي پي پي) وزيراعظم عمران خان چيو آهي ته پاڪستان ۽ ڀارت جي وچ ۾ امن تمام گهڻي اهميت رکندڙ آهي ته جيئن ان ڳالهه کي يقيني بڻائي سگهجي ته ٻنهي ملڪن جا وسيلا هٿيارن جي غير پيداواري ڊوڙ ۾ ضايع ڪرڻ بدران انهن جو رخ انساني ترقي طرف موڙيو وڃي. هن اها ڳالهه سڄي دنيا جي ناليوارن ڪاروباري اڳواڻن ۽ سيڙپڪارن جي عالمي ڪانفرنس ۾ هڪ سوال جو جواب ڏيندي چئي، 23 کان 25 آڪٽوبر تائين رياض ۾ ”مستقبل ۾ سيڙپڪاري جا موقعا“ جي عنوان سان ٿيندڙ ڪانفرنس ۾ سوالن ۽ جوابن جي ويهڪ دوران ڳالهائيندي وزيراعظم چيو ته ڀارت سان امن نه رڳو پاڪستان پر ڀارت جي لاءِ به اهم آهي.
